Kreu i Partisë Demokratike, Sali Berisha ka hedhur akuza të forta ndaj kryeministrit Edi Rama për të cilin tha se nëpërmjet ligjit të legalizimit do ta mbulojë të gjithë vendin me kanabis.
Gjatë një deklarate për mediat nga selia blu, Berisha theksoi se që tani e gjithë Shqipëria është e mbuluar me drogë të tjera si opium dhe lulëkuqe të cilat janë më të shtrenjta se kanabisi.
Berisha theksoi se policia vijon mashtrimet për aksionet anti-kanabis.
“Asgjë nuk e justifikon kanabisin në Shqipëri. Por me Edi Ramën, Shqipëria është narkoshtet tipik, i vetëm në Europë. Kanabisi mbulon vendin, por tani ka filluar të mbulojë vendin opiumi, lulëkuqja. Ju garantoj se ato do të zëvendësojnë të gjitha prodhimet e tjera se janë shumë më të shtrenjta se kanabisi. Keni parë operacionet policore, mashtrime se nuk arrestojnë një njeri të vetëm? Nuk arrestohen se janë socialistë, janë të gjithë të partisë. Plus pasojat katastrofale mbi shëndetin, në radhë të parë në shëndetin mendor. Pastaj një substancë që mbjell vetëm krim. Ne do i kundërshtojmë me forcën më të madhe.”, tha Berisha.
