Pronari i një pike këmbimi valutore në Tiranë, ku bëhej konvertimi i parave në kriptovaluta dhe anasjelltas, është shpallur në kërkim nga policia, që thotë se veprimtaria që zhvillohej ishte e paligjshme.
Në gjendje të lirë është proceduar punonjësi i biznesit në kuadër të operacionit të koduar “Crypto”, zhvilluar nga blutë e kryeqytetit nën drejtimin e prokurorisë.
Në total (cash dhe në llogari virtuale) janë sekuestruar rreth 200 mijë euro.
Hetimet janë kryer me metoda proaktive.
Personi i shpallur në kërkim është R.N., 48 vjeç, banues në Kosovë.
Ndërsa në gjendje të lirë u procedua R. B., 22 vjeç, banues në Tiranë.
“R.N., administronte një subjekt në të cilin kishte punësuar shtetasin R.B. Klientët e këtij subjekti këmbenin para duke i hedhur në portofole virtuale dhe anasjelltas, të padeklaruara pranë organeve kompente dhe që nuk gjurmohen për origjinën e tyre. Gjatë operacionit u sekuestruan 60 665 euro të përfituara nga kjo veprimtari e paligjshme si dhe dy llogari me kriptomonedha, me vlerë 135 000 euro, 2 kompjutera, 1 laptop, dhe një aparat celular”, njoftoi policia.
