Kryetari i PD-së, Sali Berisha tha se do u kërkohet shqiptarëve të bashkohen në protesta. Deklaratën e bëri këtë të premte në një konferencë për mediat nga selia blu ku foli për aferën e inceneratorëve, të cilën e cilësoi “një ndërmarrje private të Edi Ramës”.
Ai tha se do të ketë negociata me forca të tjera opozitare për protestat lidhur me aferën e inceneratorëve, në të cilën tha se qeveria ka vepruar si një organizatë kriminale.
“Ne do u drejtohemi shqiptarëve për të kërkuar largimin e kësaj qeverie me protesta. Kjo është një aferë e tmerrshme. Nuk ka shoqëri që mund të tolerojë këtë aferë. Do ketë negociata me opozitën. Do bëhen negociata me forca të tjera opozitare. Por kjo nuk mund të kapërcehet”, tha Berisha, pa dhënë një datë konkrete për nisjen e protestave.
“Do mblidhen forumet. Do diskutohet me aleatët dhe do vendoset”, shtoi.
“Koka e mbretit”
Kryedemokrati u ndal edhe te mesazhi që Arben Ahmetaj dha më herët gjatë ditës.
“Avokati im në Këshillin e Mandateve citoi një thënie të vjetër nga Franca: ‘E shoh që dy zgjidhje të mundshme ka në tavolinë, ose do të bjerë koka e mbretit, ose ju do të duhet të pranoni dështimin e revolucionit’. Unë jo e jo që s’kam gjak blu, por jam një njeri tejet i zakonshëm, me gjak nga Gjirokastra, Vlora, Korca, Rrogozhina, Kavaja, Lezha, Kukësi e Tropoja nëse doni…”, shkroi Ahmetaj në një postim në “FB”.
Sipas Berishës, me “kokën e mbretit”, ish-ministri i Financave i referohet kryeministrit Edi Rama.
“Ajo që tha avokati, koka e mbretit apo revolucionit, koka e mbretit iku. Nuk ishte Arben Ahmetaj koka e mbretit”, tha ai.
