Ish numri dy i qeverisë Rama, Arben Ahmetaj pritet të shkojë pas hekurave pas një kërkese të SPAK drejtuar Kuvendit për arrestimin e tij.
Prokuroria e Posaçme ka nxjerrë një kërkesë për arrestimin e Arben Ahmetajt, por duke qenë se ai është deputetit i Kuvendit, ligji parashikon që fillimisht ajo duhet miratuar nga ky institucion. Kërkesa e SPAK është depozituar këtë të Hënë në Kuvend, që tanimë pritet të vijojë shqyrtimin e kërkesës.
Përveç arrestimit, SPAK kërkon dhe leje nga Kuvendi për ushtrimin e një kontrolli në banesën e Ahmetajt.
Prokuroria e Posaçme kërkon që çdo procedurë që do të zhvillohet për heqjen e mandatit të Ahmetaj, si nga këshilli për mandatet ashtu dhe parlamenti, të kryhen me dyer të mbyllura për të ruajtur sekretin hetimor. Megjithatë, vendimin final për ta zhvilluar mbledhjen me dyer të mbyllura ose jo e merr Kuvendi.
Shkarkimi
Rregullorja e Kuvendit parashikon se deputeti për të cilin kërkohet dhënia e autorizimit lajmërohet për kërkesën e bërë dhe dokumentet që e shoqërojnë atë, si dhe i bëhet e ditur koha në të cilën Këshilli për Rregulloren, Mandatet dhe Imunitetin do të fillojë shqyrtimin e kërkesës. Deputeti ka të drejtë të paraqesë në Këshill, me shkrim ose me gojë, shpjegimet dhe vërejtjet e tij rreth çështjes, të përfaqësohet me mbrojtës ligjor, të drejtojë pyetje dhe të kërkojë sqarime në lidhje me kërkesën me qëllim të ushtrimit të së drejtës së mbrojtjes.
“Në përfundim të shqyrtimit, Këshilli, brenda 2 javëve harton një raport për në seancë plenare, në të cilin rekomandon rrëzimin ose miratimin e dhënies së autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës. Raporti i Këshillit u shpërndahet deputetëve”, përcakton pika 3 e nenit 118 të Rregullores së Parlamentit.
Shqyrtimi i kërkesës për caktimin e masës së sigurimit të arrestit në burg ose në shtëpi, heqjes së lirisë në çfarëdo lloj forme, apo të kontrollit personal ose të banesës të një deputeti vendoset si pikë e parë e rendit të ditës të seancës pasardhëse, pas paraqitjes së raportit të Këshillit për Rregulloren, Mandatet dhe Imunitetin. Në seancë plenare fjala i jepet në fillim deputetit, ndaj të cilit është paraqitur kërkesa, për të dhënë shpjegime ose për t’iu përgjigjur pyetjeve të deputetëve. Raporti i Këshillit nuk është objekt diskutimi. Kuvendi vendos me votim të hapur për dhënien ose mosdhënien e autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës ndaj deputetit.
Skenari i dorëheqjes
Në rastin kur Kuvendi nuk merr vendim për dhënien ose mosdhënien e autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës të një deputeti brenda 3 muajve nga data e paraqitjes së kërkesës përkatëse, atëherë kërkesa konsiderohet e rrëzuar nga Kuvendi.
Megjithatë, ky është skenari që ka më pak gjasa të ndodhë.
Nisur nga marrëdhëniet e thyera mes Ahmetajt dhe drejtuesit të mazhorancës Edi Rama prej muajsh tashmë, kërkesa e prokurorisë për arrestimin e tij pritet të miratohet nga kolegët e ligjvënësit të PS-së si dhe ata të opozitës që e kanë denoncuar çështjen në vijimësi.
Nga ana tjetër, të gjithë këto burokracira nuk do të duhet të zbatoheshin nëse Arben Ahmetaj heq dorë nga mandati i deputetit me vullnetin e tij, para se të shkarkohet nga kolegët deputetë.
Ky ishte rasti i Alqi Bllakos, ish-deputetit socialist të arrestuar po ashtu për çështjen e inceneratorëve.
Në rast se Ahmetaj nuk jep dorëheqjen, gjasat janë që Kuvendi të miratojë heqjen e mandatit brenda 10 ditëve, pra deri më 20 Korrik – që shënon ditën e fundit të punës për këtë sesion parlamentar. Megjithatë, duke pasur parasyshur raportin Ahmetaj-Rama, pritet që procedura nga Kuvendi të përshpejtohet.
