Prokuroria e Posaçme kërkon arrestimin e deputetit të Partisë Socialiste Arben Ahmetaj për çështjen e incenratorëve.
Burime pranë Kuvendit bëjnë me dije se prokuroria e Posaçme i ka kërkuar Kuvendit heqjen e imunitetit të deputetit për Arben Ahmetajn, në mënyrë që të vijojnë me arrestimin e ish-zëvendëskryeministrit dhe kontrolle në banesën e tij.
Procedura
Rregullorja e Kuvendit parashikon që kërkesa e prokurorisë të shqyrtohet në Këshillin për Rregulloren, Mandatet dhe Imunitetin.
“Në përfundim të shqyrtimit, Këshilli, brenda 2 javëve harton një raport për në seancë plenare, në të cilin rekomandon rrëzimin ose miratimin e dhënies së autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës. Raporti i Këshillit u shpërndahet deputetëve”, përcakton nëni Neni 118 i rregullores së Kuvendit.
Rregullorja parashikon se në rastin kur Kuvendi nuk merr vendim për dhënien ose mosdhënien e autorizimit për caktimin e masës së sigurimit të arrestit në burg ose në shtëpi, ose heqjes së lirisë në çfarëdo lloj forme, apo kontrollit personal ose të banesës të një deputeti brenda 3 muajve nga data e paraqitjes së kërkesës përkatëse, atëherë kërkesa konsiderohet e rrëzuar nga Kuvendi.
Megjithatë, prishja e marrëdhënieve me Ramën pritet që të çojë në një vendimarrje pro heqjes së mandatit të tij.
Hetimet
Ahmetaj është hetuar për të paktën 4 vepra penale, nga mos deklarimi apo fshehja e deklarim i rremë i pasurive, te korrupsioni pasiv i funksionarëve të lartë, pastrimi i parave dhe shpërdorimi i detyrës.
Akuza e fundit lidhet me praktikat për dhënien me koncension të inceneratorit të Elbasanit, ndërsa dyshimet e tjera kanë të bëjnë me lidhjet e dyshuara të tij me Klodian Zoton një nga tre sipërmarrësit e përfshirë në çështjen e inceneratorëve.
Në kompjuterin e Zotos, janë gjetur emaile të disa hoteleve të shtrenjta në qytete të ndryshme të Europës, u konfirmoheshin se në to kishte qëndruar Ahmetaj, pasi pagesa ishte bërë përmes kartës bankare të Zotos.
Në kuadër të këtyre hetimeve, Prokuroria e Posaçme ka vendosur në sekuestro preventive dy vila në bregdet, pas dyshimeve se ato kanë lidhje me ish zëvendës kryeministrin Arben Ahmetaj. Për njërën vilë, e cila ndodhet në zonën e Palasës, prokuroria dyshon se i përket ish bashkëshortes së zoti Ahmetaj, ndërsa tjetra në zonën e Hamallajt është në pronësi të bashkëjetueses së tij.
Për këtë fundit, Ahmetaj ka kundërshtor në gjykatë një kontroll që ushtroi BKH në muajin Mars, megjithatë kërkesa është rrëzuar si nga Apeli i GJKKO ashtu dhe Gjykata e Lartë.
Arben Ahmetaj është thirrur disa herë në SPAK javët e fundit, ndërkohë nëligjërimet publike është vetdeklaruar i pafajshëm.
