Bashkia e Tiranës ka shpallur fituesin e një tenderi 400 mijë euro për blerje kontenieri.
Përpos vlerës së madhe të tenderit për këtë objekt, ajo që bie në sy është se paratë janë dhënë “brenda partisë”. E thënë më thjeshtë, Lali Eri ia ka dhënë këto para ish-kryetarit të Bashkisë së Vorës.
Një abuzim i pastër me detyrën, pasi në dokumente rezulton se oferta e firmës së ish-kryetarit të Vorës ka qenë më e larta. Duket se, pas zgjedhjeve, Veliaj po “shpërblen” më besnikët e partisë, duke u dhënë para’ publike. I pari që e ka marrë me letra është Hekuran Brahimaj, i emëruar si kryetar i Bashkisë së Vorës pas arrestimit të Kajmakut.
Në fakt, Brahimaj ishte nënkryetar i kësaj bashkie, teksa Kajmaku e shkarkoi nga detyra. Por, zhvillimet e mëvonshme sollën që Brahimaj me “ndihmë” edhe të Erion Veliajt të emërohej kryetar. Dhe tashmë merr tender pikërisht nga përfaqësuesi politik i PS-së së qarkut të Tiranës, Erion Veliaj.
Sipas dokumenteve që disponon BoldNews.al, Bashkia e Tiranës ka shpallur fitues firmën “E M A N T E” shpk me adresë në Vorë, Muçaj, rruga “Industriale” të një tenderi.
Objekti i tenderit është “blerje kontenieri për përballimin e situatave emergjente” me një fond limit 41.231.702 lekë pa TVSH. Kohëzgjatja e kontratës është vetëm 3 javë kalendarike, çka do të thotë se kontenieri ka ardhur me kohë në Vorë. Po kush mori pjesë në këtë tender?!
Operatori ekonomik “OPTIMA COMMUNICATION” nuk dha ofertë ekonomike, pra ishte me 0 lekë. Firma “LEON KONSTRUKSION” dha një ofertë 32.078.263 lekë pa TVSH. Ndërkohë, operatori ekonomik “E M A N T E” shpk kishte një ofertë prej 40.030.775 lekë pa TVSH, ofertë e cila ishte më e larta e paraqitur në tender. Megjithëse ishtë më e larta, kjo ofertë fitoi pasi ata që ofruan më pak u s’kualifikuan, pasi s’kishin mjete për transportin e kontenierëve. Dhe në fund, firma që i përmbushte këto kushte ishte “E M A N T E” shpk.
Por, kush është pronar i kësaj firme? BoldNews.al shfletoi dokumente në Qendrën Kombëtare të Biznesit, ku rezulton se administratorja është znj. Flutura Brahimaj. Ortaku me 100 % të aksioneve është z. Hekuran Brahimaj, teksa vlera e kapitalit të kësaj firme është 363.000.000 lekë.
Kush është Brahimaj? Nga një kërkim në dokumentet e Bashkisë së Vorës rezulton se pronari Hekuran Brahimaj ka drejtuar edhe Bashkinë e Vorës në vitin 2020. Në të njëjtin vit që KQZ shkarkoi nga detyra Agim Kajmakun.
Brahimaj ishte shkarkuar më parë nga detyra. Ai paditi në gjykatë Bashkinë e Vorës dhe e fitoi në gjykatë.
Mësohet se Brahimaj ka pretenduar për të kandiduar edhe në 14 maj, por partia s’e ka lenë. E njëjta parti që i dha pa garë tenderin e majmë prej 400 mijë eurosh.
