Kryeministri Edi Rama ka komentuar edhe nga Podgorica refuzimin që kryeministri i Kosovës Albin Kurti i bëri ftesës së tij për takim në Prishtinë, në kuadër të turit ballkanik për Procesin e Berlinit dhe Ballkanin e Hapur.
Gjatë konferencës së përbashkët me Dritan Abazoviç, Rama vazhdoi me ironitë duke thënë se në Prishtinë nuk shkoi për t’u martuar dhe nuk ndihet i fyer si dhëndri që nuk i doli në takim. Rama tha se me kryeministrin e Kosovës nuk ka asnjë problem personal apo institucional, por kanë vetëm këndvështrime të kundërta për situatën në veri të Kosovës.
“Unë nuk shkova në Prishtinë për t’u martuar dhe nuk ndihem i fyer si një dhëndër të cilit nusja nuk i doli në takim. Unë shkova në Prishtinë për të pasur takime si kryeministër i Shqipërisë dhe në mënyrë absolute nuk kam asnjë problem personal, dhe aq më pak problem instiucional me kryeministrin e Kosovës.
Kam vetëm qëndrime të kundërta me një situatë të caktuar. Kaq! Këtë situatë e përjetojmë dhe duam ta trajtojmë në mënyra të ndryshme. Unë e trajtoj si një situatë që duhet ta trajtojmë bashkarisht, duke ndërsa Albini e përjeton si një situatë që duhet ta trajtojë pa u takuar dhe pa biseduar.
Është në të drejtën e tij, unë nuk jam këtu për të bërë interpretime të natyrës psikologjike, folklorike, nacional heroike. E përsëris që në takimin e Tiranës pavarësisht cili është qëndrimi i BE-së, në Procesin e Berlinit kryeministri i Kosovës do të jetë i ftuar. Në Tiranë Albin Kurti është në shtëpinë e vetë, madje dhe të futet në zgjedhje për të qenë i zoti i shtëpisë”, tha Rama.
