Kryeministri Edi Rama ka bërë një gafë ditën e sotme gjatë konferencës së tij bashkë me kryeministrin e Malit të Zi, Dritan Abazoviç, ku u takuan në kuadër të turit ballkanik për të diskutuar për Procesin e Berlinit dhe Ballkanin e Hapur
Gjatë fjalës së tij, duke folur për situatën në veri të Kosovës, Rama ka përmendur Oso Kokën, duke i pyetur gazetarët malazezë nëse a e njihnin.
“Ky është një moment ku duhet të luftojmë edhe me mendësitë e vjetra, për të luftuar me fantazmat e së shkuarës, por jo tani të bëjmë Oso Kukën nga e para të futemi në kulla, dhe të na kërkojnë të këndojmë për Oso Kukën e ri. Unë jam në sinkron të plotë kur ndodhin edhe këto situata absurde si në Veriun e Kosovës. Ne jemi të ndarë dhe jemi shumë të vegjël si tregje.
E njihni ju Oso Kukën këtej nga Mali i Zi apo jo? Keni me siguri ndonjë Oso Kukoviç që është futur në kullë ka luftuar me të gjitha perandoritë dhe është vrarë heroikisht”, deklaroi Rama.
Por, kryeministri duket se harroi se Oso Kuka u rrethua nga ushtarë malazezë në një kullë në ishullin Vraninë dhe e hodhi në erë atë duke vrarë veten dhe shumë nga ushtarët malazezë.
