Kryeministri Edi Rama u shpreh hatërmbetur nga refuzimi i homologut të Kosovës Albin Kurti për ta pritur në një takim me rastin e vizitës së tij zyrtare në Prishtinë. Në një emision televiziv në kryeqytetin e Kosovës, Rama tha se takimi i sotëm ishte për tu koordinuar për samitin e ardhshëm të Procesit të Berlinit që do të mbahet 16 tetor të këtij viti, në Tiranë. Në kushtet kur takimi nuk ndodhi, Rama la të hapur mundësinë për ti tërhequr veshur qeverisë së Kosovës në samitin e planifikuar pas tre muajsh.
“Nuk e konceptoja dot që në raportin që do bëjmë për Berlinin të shkruajmë nga Kosova s’kemi ndonjë material, propozim se s’kemi arritur të kontaktojmë. Më ka ngel hatri”, tha Rama, i cili u takua më herët me Presidenten e Kosovës Vjosa Osmani dhe kryeparlamentarin Glauk Konjufca.
Gjatë intervistës, Rama e thumboi Kurtin disa herë.
“Për mua është shumë marksist”, tha kreu i qeverisë shqiptare, i cili i qëndroi deklaratës së qeveria e Kosovës duhet të pranojë propozimin që i është ofruar nga ndërkombëtarët.
Qasja e Kurtit, i cili nga ana e tij i ka mëshuar parimit të reciprocitetit në marrëveshjen me Serbinë, për Ramën është një “lajthitje strategjike”.
“Lajthitje strategjike për një luftë taktike. Kjo e osos (Oso Kuka) është taktikë, strategjia është një lajthitje e plotë. Sepse Oso rri atje dhe situata eskalon se këta kriminele dhe këto struktura që s’janë veç serbe se është një mik ballkanik i futur në një kotej me lunatizmin serbo-ballkanik dhe nxitjen e Rusisë që është prezente atje. Shërbimet tona në Shqipëri e dinë se Rusia atje është prezente, deri vonë ka pasur njerëz të Wanger-it që kanë bërë stërvitje. E keqja më e rëndë që ndodh është që të shfaqet një forcë paramilitare me të cilën futesh në një konflikt të brendshëm”, tha Rama në “Klan Kosova”.
“Ne duhet të marrim marrëveshjen kjo është çmenduri. Këtu duket se është vetëm Albini që kujton se Kosovës po i bëhet një padrejtësi”, shtoi ai.
Sipas tij, me këtë qasja të qeverisë së Kosovës, po humb komb shqiptar.
Rama e akuzoi Kurtin se ka shmangur një takim me të përpara se ai të anulonte mbledhjen e përbashkët të dy qeverive. Madje, shtoi se nuk i përgjigjet as mesazheve të tij.
“Debatet me Albinin i bej në Whatsapp, unë flas ai dëgjon, nuk flet. Rrallë flet ose përsërit mesazhin”, tha Rama.
Ndërkohë deklaratën e kryeparlamentarit Konjufca se drafti i Ramës për asociacionin nuk është në interes të Kosovës, kreu i qeverisë iu përgjigj duke thënë se: Këta se kanë lexu fare!
