Nga Boldnews.al
Kur ka kaluar më shumë se një muaj nga vendimi për lirimin nga qelia dhe “qëndrimin në shtëpi” të ish-ministrit të Brendshëm, Saimir Tahiri, gjyqtarja e Elbasanit Matilda Fetau ende nuk ka zbardhur argumentat që e nxitën të tregohej tolerante me një prej “peshqve të mëdhenj”.
Të paktën, nga një verifikim i kryer nga “Boldnews.al” në faqen e internetit të gjykatës, rezulton se ende vendimi nuk është publikuar.
Lirimi para kohe i Tahirit shkaktoi reagim të fortë publik, pasi riktheu në vëmendjen e qytetarëve paradigmën se drejtësia është e butë me zyrtarët e lartë dhe e ashpër me “fukarenjtë”.
Por, përveç reagimin publik, vendimi i gjyqtares Fetau nuk ka ngacmuar asnjë nerv të institucioneve monituruese dhe verifikuese.
Kryeinspektori i Drejtësisë, Artur Metani, deklaroi të hënën e kësaj jave nga salla e Parlamentit se institucioni që ai drejton nuk ka ndërmarrë asnjë nismë inspektuese për vendimin e gjyqtares Fetau.
Deputetja opozitare, Albana Vokshi, e pyeti drejtëpërdrejtë Metanin për rastin e lirimit të Tahirit.
Kryeinspektori u përgjigj se nuk ka marrë asnjë ankesë për këtë rast. Ai tha se Inspektorati i Lartë i Drejtësisë ka mundësinë për të nisur edhe kryesisht procedurat e inspektimit, pra me iniciatë, porse nuk e kanë vlerësuar të bëjnë diçka të tillë për vendimin mbi lirimin e Saimir Tahirit.
Qëndrimi i Metanit duket se nuk surprizo askënd, duke mbajtur në konsideratë se, më herët, ai ka pasur pozicionin e Drejtorit Juridik në Këshillin e Ministrave, një detyrë që, me shumë mundësi, i ka krijuar raporte personale me ish-ministrin e Brendshëm.
Këto dyshime për tolerim forcohen më tej, nëse merren në konsideratë standartet e ndjekura nga Inspektorati i Lartë i Drejtësisë.
Mjafton një shembull konkret.
Rreth një vit më parë, Kryeinspektori i Drejtësisë njoftoi se nisi verifikimet mbi shkeljet etike të kryetares në detyrë të Gjykatës së Elbasanit, Enkeleda Kapedani.
Magjistratja, me mendjelehtësi, publikoi në rrjetin Tik-Tok disa video të shkurta, në të cilat ajo shfaqej duke kërcyer në zyrën e saj.
Video u publikua në rrjete sociale dhe zyra e Artur Metanit tregoi një sjellë “reaktive”, duke nisur inspektim dhe në fund, gjyqtarja Kapedani u pezullua 6 muaj nga detyra.
Duhet mbajtur në vëmendje se Kapedani u inspektua për shkelje të etikës në punë, për shkak se kërceu në zyrë.
Tani kalojmë tek rastin i gjyqtares Matilda Fetau, e cila vendosi “qëndrimin në shtëpi” për Saimir Tahirin, të cilit i kishin mbetur edhe më shumë se 20 muaj për të vuajtur në qeli, i dënuar për “shpërdorim detyre”.
Në Shkurt të vitit 2022, Gjykata e Posaçme e Apelit dënoi ish-ministrin e Brendshëm përfundimisht me 3 vjet e 4 burgim, për “shpërdorim detyre”.
Prokuroria e Posaçme nuk ishte dakord me këtë vendim dhe ushtroi rekurs në Gjykatën e Lartë, ku kërkon dënimin e tij për “pjesëmarrje në organizatë kriminale me qëllim trafikim narkotikësh”.
Ky ankim pret shqyrtimin në Kolegjin Penal të Gjykatës së Lartë. Në rast se Gjykata e Lartë pranon kërkesën e Prokurorisë, atëherë Tahiri do të duhet të vuajë një dënim me burgim akoma më të gjatë.
Por, ekziston eventualiteti që, nëse Gjykata e Lartë pranon kërkesën e prokurorisë, Tahiri mund t’i shmanget drejtësisë dhe të mos rikthehet në burg.
Atëherë, pasoja e vendimit të gjyqtares Matilda Fetau për lirimin e Saimir Tahirit do të jetë shumë herë më e rëndë për drejtësinë sesa një kërcim në zyrë nga ana e gjyqtares Enkeleda Kapedani.
Por, për Kryeinspektorin e Drejtësisë, duket se shkelja etike e Kapedanit është shumë më interesante dhe ngjall më shumë ngacmim publik, se sa vendimi i Fetaut për lirimin e një të burgosuri, i cili ende nuk i ka mbyllur përfundimisht llogarinë me drejtësinë penale.
