Nga Boldnews.al
Gjykata Kushtetuese kujtohet një vit më pas për t’i thënë qeverisë se “ka cënuar lirinë e shprehjes” me vendimin që mori për mbylljen e aplikacionit “TikTok”.
Vendimi i “kokave të jurisprudencës” i ngjan një ore të mbetur në kohë, e cila konstatohet se ka ngecur një vit më pas dhe e thonë se ka ngecur, në një kohë kur është vënë sërish në punë…, sepse qeverisë një vit iu desh bllokimi për shkak të zgjedhjeve dhe tashmë është tërhequr nga VKM-ja që bllokoi platformën TikTok.
Gjykata Kushtetuese me këtë vendim, por edhe shumë të tjera u vetëofrua të futet në librin e porpurt të skandaleve logjike duke marrë një vendim një vit më pas, me efekt tërësisht nul. “Për sa i përket pretendimit për cenimin e lirisë së shprehjes, lirisë së shtypit dhe të drejtës për informim, Gjykata vlerësoi se kërkueset legjitimohen ratione materiale për pretendimet që lidhen me kufizimin e lirisë së shprehjes dhe të lirisë së shtypit, për aq sa VKM-ja e kundërshtuar pretendohet se ka ndikuar në ushtrimin e veprimtarisë së tyre në këto drejtime”, thuhet në vendimin e Gjykatës Kushtetuese që e cilëson mbylljen e TikTok nga ana e qeverisë si “cënim i lirisë së shprehjes”.
Edhe pse efekti është zero, kryeministri gjeti kohën që të tallej me vendimin e lolove dhe eunukëve të Gjykatës Kushtetuese. “Gjykata Kushtetuese mendoka që 90% e prindërve dhe mësuesve shqiptarë ishin gabim kur kërkuan mbylljen e TIKTOK-ut! Fatmirësisht ne e rihapëm TIKTOK-un falë mirëkuptimit që gjetëm tek kompania për masat extra që u morën prej saj, pikërisht falë mbylljes, se të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot!”, shkruan Rama në rrjetin social X.
Standardet e ndjekura nga Gjykata Kushtetuese në shqyrtimin e padive që i mbërrijnë janë të shumëfishta. Në rastin e pezullimit nga detyra të zëvendëskryeministres dhe Ministres së Infrastrukturës dhe Energjitikës Belinda Balluku, kushtetuesja nxitoi ta merrte në shqyrtim, madje pezulloi pezullimin e Ballukut, deri në vendimin përfundimtar që në fund e la në fuqi pezullimin.
Çështje të tjera të ndjeshme që vijnë si ankesë nga opozita, grupimet mediatike apo organizma të ndryshme që lidhen me shkeljet e mundshme ligjore dhe kushtetuese që mbajnë firmën e qeverisë, lihen për një kohë të gjatë në “pritjen e pafundme” dhe kur merren në shqyrtim, është më vonë se vonë. Në rastin e Olta Xhaçkës u kërkua nga opozita heqja e imunitetit pasi përfitoi si “investitore strategjike” dhe dolën më vendim kur Parlamenti po mbyllte mandatin 4-vjeçar dhe nuk kishte më asnjë vlerë, as juridike, as praktike. Po ashtu edhe çështja e mbylljes së platoformës TikTok shqyrtohen pas të vjelave, kur dëmi është bërë dhe për më tepër vendimi del plotësisht nuk, pasi platforma është rihapur…!
Nëse me vendimin e sotëm Gjykata Kushtetuese u bë qesharake me veten, reagimi i kryeministrit në ironi therëse ishte i tepërt. Duhej mëshirë për ta, por kreu i qeverisë nuk ndaloi, në një bullizim të frikshëm ndaj tyre. Por edhe nëse e marrin në “shqyrtim bullizimin” përçmues të kryeministrit ndaj vetë atyre, vendimin mund ta shpallin se u ndjenë të maltrajtuar ndoshta pasi kryeministri të jetë larguar… Kjo është “elita e jurisprudencës” shqiptare!
