Kreu i Partisë së Lirisë, Ilir Meta dhe ai i Partisë Demokratike, Sali Berisha kanë uruar ditën e Pavarësisë së Shteteve të Bashkuara të Amerikës.
Përmes një postimi në Faceebook, ish-presidenti Meta thotë se SHBA ka qenë dhe mbetet shembull e burim frymëzimi për të gjithë njerëzit dhe kombet që aspirojnë për demokraci të vërtetë, për liritë dhe dinjitetin njerëzor.
Reagimi nga Ilir Meta:
“Aty ku strehohet liria, atje gjendet vendi im”. – Benjamin Franklin
SHBA kanë qenë dhe mbeten shembull dhe burim frymëzimi për të gjithë njerëzit dhe kombet që aspirojnë për demokraci të vërtetë, për liritë dhe dinjitetin njerëzor.
Gëzuar Festën e Pavarësisë SHBA, popullit amerikan dhe të gjithë shqiptaro – amerikanëve, të cilët kanë kontribuar pa rreshtur për forcimin e miqësisë afatgjatë dhe të marrëdhënieve tona strategjike!”, shkruan Meta.
Në krahun tjetër, Berisha urimin e ka shoqëruar me një kolazh fotosh të takimeve të tij në kohën kur ishte kryeministër me ish-presidentët e SHBA.
Reagimi nga Sali Berisha:
“4 Korriku- dita e Pavarësisë së SHBA!
Miq, sot kombi i madh amerikan feston!
Kombi i lirisë feston ditën e Pavarësisë, 247 vjetorin e Pavarësisë së tij. Ne këta 247 vite, kombi i madh amerikan shndërroi SHBA në vendin më te lirë, më të fuqishëm, më të zhvilluar dhe më të begatë të planetit dhe kontribuoi më shumë se çdo komb tjetër për lirinë e kombeve të tjerë të shtypur dhe pushtuar në mbarë botën.
Për ne shqiptarët, një komb jetim me histori tejet të veshtirë, kjo është një ditë e bekuar pasi në të gjitha momentet tona kritike kemi patur fatin e madh të kemi në krahun tonë SHBA, të cilat kanë luajtur role përcaktues për lirinë e kombit tonë.
Duke shprehur mirënjohjen tonë të pakufishme le të urojmë nga zemra:
Zoti i bekoftë SHBA-të, flamurin dhe lirinë e tyre!”, shkruan Berisha.
