Kryeministri Edi Rama flet me superlativa për ambasadoren Yuri Kim, e cila mbyll detyrën diplomatike në Shqipëri.
Në një reagim në rrjetin social FB, të cilin ai vetë e cilëson “mbase diplomatikisht skandaloz”, Rama thotë se Yuri Kim e deshi shumë Shqipërinë dhe për këtë ai e ka dekoruar me medalje.
“Në fund të misionit të saj, nuk më mbeti tjetër veçse t’i dorëzoj ambasadores Yuri Kim, Yllin e Madh të Mirënjohjes Publike, për sa shumë e deshi Shqipërinë, sa shumë u përpoq për të ndihmuar që Shqipëria në ikje të saj, të bëhej një vend më i mirë se sa ai që ishte kur ajo erdhi…”, shkruan mes të tjerash Rama, i cili mes rreshtave i drejtohet ambasadores miqësisht: “Faleminderit për gjithçka e dashur Yuri”.
Për shumë analistë dhe zëra të spikatur të opinionit publik, ambasadorja amerikane Yuri Kim i ka shërbyer zgjatjes së pushtetit të shumëkritikuar të Edi Ramës.
Kritika më të ashpra kanë ardhur nga opozita. Kreu i PD-së, Sali Berisha e ka quajtur ambasadoren “një McGonigal me fustan” e cila sipas tij, ka tentuar të shkatërrojë opozitën.
