Nga Boldnews.al
Armando Subashi, kryetari i Bashkisë së Fierit, i ka shpëtuar për mrekulli prangave nga afera e inceneratorëve.
Megjithëse ka letra që ai ka firmosur, ka qenë dakort, apo ka bërë edhe studime që u kanë ardhur në ndihmë firmave, pronarët e së cilës janë arrestuar, në kërkim dhe nën hetim, Subashit nuk i ka hyrë “gjemb në këmbë”.
Dhe, përpos kësaj, firmos çdo ditë bërjen e tenderëve, edhe të pastrimit të qytetit të Fierit. Por, këto para’ po shkojnë te një duar njerëzish, ose më sakte te një firmë, e cila çuditërisht po “mund” çdokënd që merr pjesë në tenderët e Bashkisë së Fierit, të firmosur nga Armando Subashi.
Bëhet fjalë për firmën “Kombi Invest”, e cila brenda një periudhe të shkurtër ka “shkundur” buxhetin në Fier. Mësohet se shumicën e procedurave të “pista” fitohen nga kjo firmë, e cila u lakua në media kur i dha një kontratë pune një anëtari të Bandës së Durrësit, për ta përdorur në gjykatë për lirim.
Në datën 23 qershor 2023, Bashkia e Fierit ka shpallur fituesin e tenderit me objekt “blerje mjete teknologjike për nevojat e ndërmarrjes së pastrimit Fier”. Bëhet fjalë për kamionë teknologjik për mbetjet urbane (kompaktor), me burim financimi nga buxheti i ndërmarrjes së pastrimit Fier. Fondi për këtë procedurë ka qenë 12.000. 000 lekë pa TVSH.
“Me anë të këtij njoftimi ju informojmë se, në këtë procedurë kanë marrë pjesë operatori ekonomik ‘GERARD – A’ me vlerë totale 10.500.000 lekë pa TVSH. Operatori ekonomik ‘KOMBI INVEST’ me vlerë 10.800.000 lekë” thuhet në dokumente.
Pra, oferta më e ulët ka qenë e firmës “GERARD – A”. Por, kjo ofertë është s’kualifikuar pasi s’ka paraqitur katalog teknik ose skedë teknike për mjetin, i cili minimalisht duhet të përmbajë një përshkrim të karakteristikave teknike dhe të dhënave të tjera në lidhje me markën, vendin e origjinës, vitin e prodhimit. Në fund, firma “KOMBI INVEST” është shpallur fituese, pasi plotësonte dokumentet e tenderit!
Ndërkohë, me të njëjta procedura, Armando Subashi e ka shpallur fitues firmën “KOMBI INVEST” edhe në vitin 2021. Në atë kohë u bë tenderi “shërbimi i pastrimit dhe largimit të mbeturinave (mbetjeve urbane) në Njësitë Administrative dhe kryerja e shërbimit të mirëmbajtjes së varrezave publike në Njësitë Administrative të Bashkisë Fier”.
Fondi për këtë tender ka qenë plot 198.984.172 lekë pa TVSH, me burim financimi nga Buxheti i Bashkisë Fier, teksa shërbimi ka një afat 42 muaj (korrik 2021- dhjetor 2024). Pra, një kontratë ende në fuqi.
Mësohet se në tender mori pjesë “KOMBI INVEST” e ofertë 197.168.192 lekë, firma “ALKO IMPEX CONSTRUCTION” me vlerë 194.165.013 lekë, “VICTORIA INVEST” me vlerë 160.489.298 lekë. Por, të tria firmat që ofruan më pak, që kanë fituar një mori tenderësh në të gjithë Shqipërinë, u s’kualifikuan pasi nuk plotësonin dokumentet e Subashit. Çuditërisht, këto specifikime plotësoheshin vetëm nga “KOMBI INVEST”.
