Kryeministri Edi Rama, në një reagim pas lirimit të 3 efektivëve të policisë së Kosovës nga një gjykatë në Serbi, ka krahasuar veriun e Kosovës me Donbasin në Ukrainë. Një rajon, pretendimi i së cilit, ka sjellë konflikte të armatosur mes forcave ukrainase dhe separatistëve prorusë.
“Fatkeqësisht, së fundmi të dyja palët i kanë sytë tek fronti i politikës së brendshme dhe tek sondazhet e përflakura nga retorika nacionaliste. Ndërsa dialogut jetik për të ardhmen e krejt rajonit dhe marrëdhënieve me botën demokratike u kanë kthyer kurrizin. Ndërkohë situata në Veri degradon me orë e me minuta, duke rritur edhe mundësinë e largqoftë një “Donbasi” ballkanik mu në zemër të Europës. Kjo mundësi edhe vetëm ta mendosh është katastrofike, prandaj duhet eliminuar me çdo kusht”, shkruan Rama në Twitter.
Më tej, ri përsërit kritikat ndaj qeverisë së Kosovës së drejtuar nga Albin Kurti.
“Miopia strategjike në qasjen ndaj dialogut, zvarritja e planit të shkëlqyer franko-gjerman, devijimi i fokusit tek demonstrimet e forcës dhe si rrjedhojë, degradimi i situatës në Veri, mund t’i kushtojnë gjithë këtij rajoni, Serbisë padiskutim, po sidomos Kosovës më shumë se çdokujt tjetër, një kthim i mosozotshëm mbrapa, me pasoja shumëvjeçare”, shton.
Shqipëria, zotohet Rama, do të bëjë çmos që kjo të mos ndodhë.
Kreu i qeverisë së Shqipërisë është shfaqur më pro Presidentit të Serbisë Aleksandër Vuçiç, me qëndrimet e tij publike lidhur me tensionet e fundit në Kosovë.
Madje, më herët gjatë muajit, ai anuloi në mënyrë të njëanshme dhe të paprecedentë një mbledhje të përbashkët të qeverive të Shqipërisë e Kosovës.
Ndërsa në një konferencë për mediat nga Tirana 10 ditë më parë, Rama ushtroi presion mbi Kurtin për të pranuar marrëveshjen që i është ofruar. Kryeministri shqiptar tha se marrëveshja në tryezën e Kosovës nga bashkësia euroatlantike, është një mundësi e artë dhe paralajmëroi se mund të mos jetë aty përgjithmonë.
