Tre efektivët e policisë kufitare të Kosovës të cilët mbaheshin nën arrest nga forcat serbe prej 14 Qershorit, janë liruar nga qelia. Sipas mediave të Kosovës, vendimi për lirimin e tyre u mor nga gjykata e Kralevës këtë të hënë, kur në Bruksel kryediplomatët e vendeve të BE pritet të diskutojnë për dialogun mes Kosovës dhe Serbisë dhe tensionet e fundit mes dy vendeve.
Kryeministri i Kosovës Albin Kurti, përmes një postimi në Twitter, u shpreh se rrëmbim i tyre konsiston në një shkelje të rëndë të të drejtave të njeriut për të cilën Serbia duhet të mbajë përgjegjësi.
“Konfirmojmë se 3 policët e rrëmbyer janë liruar. Edhe pse jemi të gëzuar që ata kthehen në familjet e tyre, ky rrëmbim konsiston në një shkelje të rëndë të të drejtave të njeriut dhe duhet qortuar. Agresioni serb duhet të mbajë përgjegjësi”, shkruan Kurti.
Tre Policët u arrestuan më 14 qershor nga forcat serbe, gjatë një patrullimi në vendin e quajtur Tresave/Bare, në vijën kufitare në veri të Kosovës. Efktivët u dërguan në Beograd, ku dhe u mbajtën të burgosur për 12 ditë. Rrëmbimi i tyre erdhi vetëm një ditë pasi autoritetet policore të Kosovës arrestuan një serb të konsideruar si person tepër i rrezikshëm, i cili akuzohet se ka organizuar protestat e dhunshme në Veri të vendit.
Qeveria e Kosovës kërkoi lirimin e menjëhershëm të tre policëve duke thënë se ata janë rrëmbyer thellë brenda territorit të Kosovë dhe se Serbia ka kryer agresion ndaj vendit. Kosova paraqiti gjithashtu prova konkrete që vërtetojnë se 3 policët e saj janë rrëmbyer nga forcat speciale të Serbisë, brenda territorit të Republikës së Kosovës. Ministri i Brendshëm, Xhelal Sveçla, publikoi një video, në të cilën detajohet plotësisht se si ka ndodhur ngjarja në veri të vendit. Në pamjet filmike, dokumentohet dhe prezenca e mjeteve të forcave speciale serbe, që provojnë se ata kanë shkelur kufirin. Shenjat e lëna në rrugë, tregojnë që ata janë kthyer sërish në territorin e Serbisë, gjë e cila sipas autoriteteve të Kosovës, konfirmon se gjithçka ka qenë e planifikuar mirë.
Nga ana tjetër, Beogradi pretendoi se efektivët kishin shkelur kufirin serb. Komuniteti ndërkombëtar ka kërkuar vazhdimisht lirimin e tyre pa kushte. Lajmi për arrestimin e efektivëve pati ardhur në kohën e rritjes së tensioneve në mes të Kosovës dhe Serbisë.
