Kryeministri Edi Rama vijon të jetë kritik me qeverinë e Kosovës për qasjen e krizës së re të marrëdhënieve me Serbinë. Këtë të Premte, ai paralajmëroi se Kosova mund të humbasë mundësinë e artë për një marrëveshje me Serbinë.
Nga kryeministria në Tiranë, në një konferencë të përbashkët me kryeministrin e Hungarisë Viktor Orban, Rama tha se Kosova ka një dokument marrëveshje të mbështetur nga bashkësia euraltantike. Dhe kjo, sipas tij, është një mundësi e artë. Madje, Rama paralajmëroi se kjo marrëveshje “nuk është e thënë që është që të jetë aty përgjithmonë”.
“Mund të hyjmë në një tjetër kohë të gjatë në histori ku nuk mund të kemi zgjidhje”, tha kryeministri.
Marrëveshja në fjalë kundërshtohet nga qeveria e Kosovës pasi Beogradi zyrtar kërkon formimin e asociacionit të komunave me shumicë serbe në Kosovë. Qeveria në Prishtinë e ka refuzuar kërkesën me arsyetimin se mund të rrezikojë funksionalitetin e shtetit. Kurti është shprehur se duket të zbatohet parimi i reciprocitetit. Nëse pala serbe kërkon asociacionin në Kosovë, duhet të pranojë një të tillë në Serbi, është shprehur ai. Serbia, nga ana tjetër, qëndron e palëkundur në kërkesën e saj.
Në këto kushte, zgjidhjen e ngërçit, kryeministri Edi Rama e sheh duke i lëshuar pe Serbisë. Madje, disa ditë më parë, ai anuloi në mënyrë të njëanshme dhe të paprecedentë një mbledhje të përbashkët të qeverive të Shqipërisë e Kosovës.
I pyetur nga mediat gjatë konferencës së sotme, Rama u ndal dhe te rasti i tre policëve të Kosovës që po mbahen në Serbi. Ai i bëri thirrje që ata duhet të lirohen.
Pyetje: Situata në veri të Kosovës nuk ka ndryshuar. Policët nuk janë liruar ndërkohë që ka pasur sot të tjera episode tensionimi ndaj dua t’ju pyes kryeministër Rama nëse ju po vazhdoni përpjekjet tuaja për të komunikuar me Albin Kurtin për të dalë me një zgjidhje të përbashkët apo pas dështimit të takimit në Gjakovë ju jeni dorëzuar.
Rama: Është imediate nevoja, domosdoshmëria, urgjenca, që të tre punonjësit e policisë së Kosovës të kthehen në shtëpi. Përtej pretendimeve që janë kapur këtu apo kanë hyrë atje, apo janë marrë këtu apo janë gjendur atje, për të cilat KFOR-i nuk do të japë konkluzion publik, por do të depozitojë dosjen përkatëse në NATO, është absolutisht e qartë që në të gjitha rastet, 3 efektivët s’kanë bërë asnjë krim dhe nëse do supozonim që kanë shkelur vijën e kufirit, shkelja e vijës së kufirit ka vetëm një përgjigje, kthimin e tyre në shtëpi. Ne jemi të fokusuar qysh nga momenti i parë për ta bërë këtë të mundur. Po përdorim gjithë kanalet e mundshme që e mundshme që kjo të ndodhë sa më parë.
Për sa i përket anës tjetër të pyetjes ‘një zgjidhje të përbashkët’, zgjidhja e përbashkët është e ofruar nga bashkësia euroatlantike me pikat shumë të qarta dhe të palëvizshme siç dhe ju e shikoni dita ditës dhe ajo që është më e rëndësishmja për interesin tonë është që paqja është në tryezë. Dokumenti i marrëveshjes është në tryezë dhe mundësia historike është në tryezë për të mbyllur një kapitull shumë të gjatë dhe të dhimbshëm dhe për të hapur një kapitull të ri dhe për ta bërë Kosovën një vend të njohur ndërkombëtarisht, veçanërisht nga të gjithë, edhe nga Serbia. Është kaq e madhe kjo mundësi, është kaq i rëndësishëm ky moment në histori saqë të gjitha këto të tjerat janë produkt i një devijimi tërësisht të panevojshëm nga fokusi. Fokusi është të bëhet paqja ndërkombëtare në tryezë. Dhe sot bashkësia euroatlantike i ka dhënë Kosovës mundësinë e artë dhe propozimi në tryezë i mbështetur nga bashkimi europian dhe SHBA është gjëja më e mirë që mund ti ndodhë Kosovës. Prandaj edhe një gjë do të shtoja. Unë nuk kam eksperiencën e kryeministrit, por besoj mund ta them me plot gojën, ajo marrëveshje që është në tavolinë dhe kjo mundësi e artë që është në këtë moment nuk është e thënë që është që të jetë aty përgjithmonë.
Situatat mund të ndryshojnë, konjukrurat mund të ndryshojnë, dinamikat mund të ndryshojnë dhe pastaj mund të hyjmë në një tjetër kohë të gjatë në histori ku nuk mund të kemi zgjidhje. Unë jam i fokusuar 100 përqind te kjo zgjidhje. Të tjerat mund të jenë pilula ekzaltimi për ata që e identifikojnë veten si patritotë në luftëra imagjinare, por nuk sjellin asnjë përveç zhgënjimit, boshllëkut, humbjes së kohës dhe largqoftë dhe të mundësisë.
