Ish-zv.kryeministri dhe ish-ministri i Financave, Arben Ahmetaj ka dalë pas 6 orësh nga SPAK. Në prononcimin e shkurtër për gazetarët, ai nuk dha detaje mbi dëshminë e tij për prokurorët e Prokurorisë së Posaçme. I pyetur nëse do kthehet sërish në SPAK, ai tha se do të shkojë sa herë të jetë nevoja.
“Sqaruam pozicionin, kaq. Faleminderit!”– u shpreh Ahmetaj
I druheni arrestimit? “Faleminderit”
Do vini sërish? “Të jeni mirë të gjithë. Sa herë të duhet”
Burime bëjnë me dije se Arben Ahmetaj ditën e sotme ka dëshmuar vetëm në lidhje me çështjen e inceneratorëve. Ai ka dëshmuar si person nën hetim dhe end jo si një i penduar.
Ahmetaj është zyrtarisht nën hetim për 4 akuza dhe duhet të provojë që është i pafajshëm. Për çështjen e koncesionit për inceneratorin e Elbasanit, ish-ministri i Financave akuzohet për “shpërdorim detyre”. Ndërsa për një kallëzim tjetër për pasurinë e tij, Ahmetaj po hetohet për veprat penale“pastrim të parave”, “korrupsionit” dhe “fshehja e pasurisë”.
Emri i Arben Ahmetajt u lakua në inceneratorin e Elbasanit, pasi në kompjuterin e biznesmenit Klodian Zotos u zbuluan të dhëna që tregojnë se si ky i fundit i kishte paguar udhëtime dhe qëndrime në hotele luksoze ish-ministrit të Financave, në disa vende të Europës.
SPAK i sekuestroi më pas Arben Ahmetajt dhe dy vila, ku ushtroi dhe kontrolle në to në kërkim të provave. U sekuestrua një vilë në Hamallaj që ishte në emër të bashkëjetues së tij, Erjola Hoxha. Po ashtu, iu sekuestrua dhe një vilë në Palasë, që u dyshua se i përkiste Albina Mançkës, ish-bashkëshortes së Ahmetajt dhe që në fakt rezulton se është nën pronësi të shtetases Elda Dinaj.
Arben Ahmetaj ka qenë drejtues i ministrisë së Financave në kohën kur është dhënë pëlqimi për ndërtimin e inceneratorit të Elbasanit.
Ish-ministri i Financave është nën hetim nga SPAK dhe për një çështje tjetër. Ai akuzohet për privatizim në kundërshtim me ligjin te aseteve në rrugën“5 maji” të shoqërisë “Buka”, mbi të cilën sot ngrihet një pallat. Në vitin 2014, si ish-ministër i ekonomisë, ai ka firmosur vendimin që shfuqizonte firmën e gjykatave, duke i rrëmbyer pronarëve legjitimë me mbiemër Myderizi rreth 6370 m2 truall.
Kallëzuesit kanë vënë në dijeni SPAK-un se, Arben Ahmetaj, zhvilloi ankandin për shitjen e aksioneve tek biznesmeni Lirim Fezollari. Në kuadër të këtij hetimi, SPAK-u ka siguruar informacion se, pas procedurës së privatizimit, Arben Ahmetaj dhe Fezollari kanë udhëtuar në një të njëjtin avion drejt një vendi të Bashkimit Europian.
