Delegacioni i Bashkimit Evropian në Shqipëri i bën thirrje Qeverisë që të mos ndërpresë konsultimet me BE-në sa i përket projektligjit për lejimin e kultivimit të kanabisit për qëllime mjekësore.
Në një prononcimpër “Panorama TV”, zyra e Bashkimit Europian në Shqipëri i kujton Qeverisë që të marrë vendime duke pasur parasysh aftësinë e institucioneve ligjzbatuese në vend.
Zyra e Bashkimit Evropian në Shqipëri është skeptike për institucionet ligjzbatuese në vendin tonë ndaj i kërkon Qeverisë të mos ndërpres konsultimet me BE sa i takon projektligjit për legalizimin e kanabisit mjekësor.
“Në mars të këtij viti, shërbimet e BE-së kishin dhënë komente paraprake në veçanti për aspektet e zbatimit të projektligjit. Megjithatë, ende nuk e kemi parë draft dokumentin, i cili është miratuar nga Këshilli i Ministrave. Shërbimet e BE-së u kanë kërkuar autoriteteve shqiptare të vazhdojnë konsultimin me BE-në për nismat legjislative në lidhje me kultivimin e kanabisit për përdorim mjekësor dhe industrial”, thuhet në reagimin e BE.
Po ashtu, zyra e BE në Shqipëri i kujton Qeverisë që duhet të marrë vendime duke patur parasysh aftësinë e institucioneve ligjzbatuese.
“Delegacioni i BE-së është në dijeni për miratimin nga Qeveria shqiptare të një projektligji për të lejuar kultivimin dhe përpunimin e kanabisit për qëllime mjekësore dhe industriale. Në këtë kontekst, çdo nismë që lejon kultivimin dhe përpunimin e kanabisit për qëllime mjekësore dhe industriale duhet të vlerësohet tërësisht në raport me aftësitë administrative dhe ligjzbatuese të vendit”, thuhet në reagim.
Qeveria miratoi të premten që shkoi projektligjin për kultivimin e kanabisit për qëllim industrial. Megjithatë nisma e qeverisa ka hasur kundërshti edhe nga opozita e cila e ka konsideruar si taksë që kryeministri Rama paguan ndaj bandave të cilat e mbajnë në pushtet.
