Studentët e Fakultetit të Mjekësisë mesditën e sotme kanë dalë në protestë para Universitetit me pankarta ku kundërshtojnë këtë vendim si edhe penalizimet financiare.
Para nisjes së studimeve, studentët e mjekësisë duhet të firmosin kontratë për të punuar të paktën 3 vite në atdhe, pas përfundimit të studimeve duke i mbajtur peng diplomën, ose në të kundërt do paguajnë tarifën vjetore të shkollimit, me koston reale, vlerë e cila ende nuk është përcaktuar. Por këtë gjë, studentët e mjekësisë e kundërshtojnë.
Një student i mjekësisë ka folur ditën e sotme teksa janë duke protestuar për punësimin e detyrueshëm. Ai tha se nuk ka pse të ndihen të kushtëzuar se ku duan t’i vazhdojnë studimet apo se ku duan të punojnë.
“Ne nuk duam të ndihemi të kushtëzuar, e vendosim vetë se çfarë do bëjmë me jetën tonë. Ne duam të rrimë këtu, të ikim jashtë, është puna jonë dhe askush tjetër. Tarifa 5 mijë euro është marramendëse. Ne do jemi gjithnjë kundra dhe nuk ndalemi nga protestat”– tha studenti në protestë.
Studentët e mjekësisë, kanë kundërshtuar planin e qeverisë për punësimin me detyrim. Ata thonë se kurrsesi nuk do duhet të detyrojnë studentët të rrinë këtu.
“Kundërshtim për ministrinë e Arsimit dhe Shëndetësisë. Ne jemi të bashkuar sot për qëllimin tonë të përbashkët për refuzimit të kësaj nisme. Ne jemi të vetëdijshëm për largimin e mjekëve por nuk pranojnë detyrimin si zgjidhje. Aktin e konsiderojmë të padrejtë. Detyrimi i mjekëve për të ndenjur në Shqipëri, është shkelje e demokracisë. Ata na thanë që shtetit i duhet të shpenzojë 5 mijë euro për studentët, që nuk është fare e vërtetë pasi fakultetet kanë shumë probleme. Ne këtë nuk e pranojmë këtë as tani, as në sezon kur studentët të mos jenë këtu. Kur përballeni me fenomenin, pyesni veten se pse po ikin. Ne duam përmirësime konkrete. Përmirësoni kushtet dhe mjekët do të rrinë. Mjeku do duhet ftuar jo detyruar.”- thotë një studente e mjekësisë.
Një përfaqësuese e tyre theksoi se studentët ishin kundër kësaj ideje, ndërsa shtoi se ky rregull nuk është zgjidhje për të frenuar ikjen e mjekëve. Sipas saj, para se qeveria të frenojë ‘eksodin’, duhet të pyesi se përse po ikin mjekët.
Protestuesja: “Ky vendim nuk ka lidhje me planin për të ndaluar ikjen e mjekëve. Në takimin e djeshëm na u tha se drafti nuk është përgatitur por propozimi është ende në nivel diskutimi. Ne jemi të bashkuar sot për qëllimin tonë të përbashkët për të kundërshtuar këtë ide, propozim draft apo çfarë do qoftë në lidhje me këtë çështje. Detyrimi për të punuar në vend për tre vite pas studimeve, në të kundër pagimi i një tarife 13 herë më të lartë se ajo që paguhemi, pra rreth 5 mijë euro në vit nuk është zgjidhje. Detyrimi në çfarë do lloj forme nuk është zgjidhje. Këtë alternativë të paraqitur nga ana e dy ministrive dhe rektoratit të Universitetit të Mjekësisë e konsiderojmë të padrejtë dhe të pa pranueshëm për disa arsye. Së pari kjo bie ndesh me parimet demokratike, atë të lëvizjes së lirë. Një vend si Shqipëria, që synon BE, është vendim shumë diskriminues. Nuk pretendohet se shkollimi vlen kaq shtrenjtë. Nuk do ta pranojmë këtë vendim. Nuk duam që në shtator të gjendemi pabesisht. Pyeteni veten se pse po ikin mjekët? Çfarë po bëni për t’i mbajtur? Përmirësoni arsimin dhe sistemin shëndetësor. Përmirësoni kushtet. Studentët e Mjekësisë ftohen, jo detyrohen!”
Një nismë e tillë që ende nuk është bërë konkrete, u paralajmërua nga kryeministri Edi Rama në Kongresin e parë të Shëndetësisë të mbajtur nga Ministria e Shëndetësisë në fillim të këtij muaji.
Para nisjes së studimeve, studentët e mjekësisë duhet të firmosin kontratë për të punuar të paktën 3 vite në atdhe, pas përfundimit të studimeve duke i mbajtur peng diplomën, ose në të kundërt do paguajnë tarifën vjetore të shkollimit, me koston reale, vlerë e cila ende nuk është përcaktuar.
Studentët e mjekësisë janë paraqitur ashtu siç e kishin lajmëruar para rektoratit të UMT-së. Ata refuzojnë punësimin me detyrim.
