34-vjeçari shqiptar Alidon Marqeshi është arrestuar këtë të hënë në Tiranë pasi ishte në kërkim ndërkombëtar i akuzuar për vrasje.
Marqeshi ishte duke udhëtuar me automjetin e tij tip ‘Benz’ kur është ndaluar nga policia, pasi është konstatuar me një sasi kokaine në mjet.
34-vjeçari është vënë në pranga dhe pas verifikimeve ka rezultuar se ishte autor i një vrasje të ndodhur në Gjërmani në vitin 2017.
Lidhur me vrasjen në 2017:
Vrasja ka ndodhur në muajin prill të vitit 2017, ku viktimë mbeti 19-vjeçari shqiptar Xhoi Musaj.
Musaj u vra në bregun e një liqeni në qytetin e Ulmit në Gjermani dhe trupi i tij u hodh në ujë. Mësohet se dy autorët shqiptarë të vrasjes, një 47-vjeçar dhe Alidon Marqeshi që u arrestua me lëndë narkotike në Tiranë, e kryen vrasjen për arsye hakmarrje.
Të dy shqiptarët joshën viktimën në prill 2017 për ta dërguar deri tek liqeni ku më pas e goditën 8 herë pas koke me çekiç, duke e lënë të vdekur në vend. Familja e Musajt, në atë kohë, ka qenë në dijeni se i riu është kërcënuar me vrasje për hakmarrje sipas rregullave të së drejtës zakonore të kanunit, sapo ka mbushur moshën madhore. Kjo ishte arsyeja pse ai u largua në drejtim të Gjermaninë me nënën dhe vëllain më të vogël, por sërish nuk i shpëtoi vdekjes. Vrasësit e tij dyshohet se morën dijeni për vendndodhjen e 19-vjeçarit përmes postimeve të tij në llogarinë e rrjetit social Facebook. Njëri prej vrasësve, 47-vjeçari identiteti i të cilit nuk bëhet me dije kishte disa vite që jetonte në Gjermani dhe kishte në pronësi një lavazh atje. Dy vite pas ngjarjes, drejtësia gjermane e dënoi me burgim të përjetshëm për vrasjen në bashkëpunim të Xhoi Musajt.
