Ish-kryetari i PD-së, Lulzim Basha ka reaguar pas tensioneve të djeshme në mbledhjen e kryesisë së PD-së së vulës. Ajo që ndodhi kishte protagonistë mbështetës të Lulzim Bashës, të cilët kërcënuan dhe ofenduan deputetët të cilët shfaqën një qëndrim ndryshe nga grupi i Enkeljet Alibeajt.
Në një postim në rrjetet sociale këtë të Mërkurë, Basha thotë se dënon çdo përpjekje për tensionim.
“Fryma e debatit konstruktiv me të cilën Kryesia e PD debatoi për më shumë se 8 orë për gjetjen e rrugës më të mirë në funksion të riorganizimit të PD, është shenjë e qartë e një reflektimi të thellë që ka nisur brenda familjes tonë politike.
Nuk ka gjë më demokratike se mendimet e ndryshme në një forum politik. Debatet dhe mendimi ndryshe duhen respektuar nga të gjithë. Vlerat demokratike që na drejtojnë në këtë rrugëtim të vështirë për ne demokratët nuk mund të cënohen nga asnjë individ.
Refuzoj dhe dënoj me forcë çdo përpjekje për tensionim që ushqen kulturën e vjetër politike të baltës dhe shantazhit me të cilën jemi ndarë njëherë e mirë dhe që duhet lënë pas”, shkruan ai në rrjetet sociale.
