Kryeministri Edi Rama ka reaguar për herë të parë pas lirimit nga burgu të ish-ministrit të Brendshëm, Saimir Tahirit.
Në një takim me militantët socialistë në Tiranë, Rama tha se drejtësia duhet të jetë e barabartë për të gjithë, duke i dalë në mënyrë të drejtpërdrejtë në krah ish-ministrit të Brendshëm, i cili u dënua me 3 vite e 4 muaj burg për veprën penale të “shpërdorimit të detyrës”.
“Këtu ne kemi hapur vetë këtë kuti të Pandorës sepse nuk kemi pranuar që të marrim përsipër përgjegjësinë e qeverisjes së këtij vendi duke mbajtur këmbën tek kapaku i kësaj kutie për të vazhduar avazin e sa shekujve ku të pushtetshmit, të fuqishmit apo të mbrojturit e këtij vendi, asnjëherë nuk janë thirrur nga drejtësia. Këtë e kemi bërë ne. 100 herë të kthehesha mbrapa, do të bëja të njëjtën gjë.
Duhet të vazhdojmë në një rrugë me sy mbyllur duke bërë sikur s’kuptojmë ose kush është i joni mund të bëjë çfarë të dojë me ligjin dhe me pasurinë e përbashkët dhe nuk preket. Apo duhet të ndjekim një rrugë tjetër. E kemi zgjedhur këtë rrugë tjetër dhe në këtë rrugë nuk ka asnjë kthim prapa dhe asnjë kompromis me askënd. Natyrisht që unë personalisht e kam ditur që kjo nuk është një rrugë që do të mbarojë shpejt, rruga e në mandati apo dy mandateve e një gjenerate për të arritur që ky vend të ketë drejtësi të barabartë për të gjithë.”, tha Rama.
Ndryshimi i masës së sigurisë nga “Arrest me burg” në “Arrest shtëpie” ka bërë që autoritetet ndërkombëtare të kërkojnë dokumentacionin e nevojshëm për këtë vendim që ka shkaktuar shumë polemika.
Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj. Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar. Ky vendim u la në fuqi dhe nga Gjykata e Posaçme.
