Ish-ministri i Brendshëm, Samir Tahiri është liruar nga burgu.
Gjyqtarja e Elbasanit Matilda Fetahu vendosi këtë të Premte të pranojë kërkesën e mbrojtjes së Tahirit pas paraqitjes së disa raporteve mjekësore, duke liruar ish-ministrin nga qelia. Raportet mjekësore lidhen me bashkëshorten e ish-ministrit dhe sipas tyre ajo ka probleme shëndetësore. Pasi i mori në shqyrtim, Gjykata vendosi që pjesën e mbetur të dënimit, 1 vit, 8 muaj dhe 15 ditë burgim, Tahiri ta kryejë në banesë – në zonën e Kodrës së Diellit në Tiranë. Akuza e përfaqësuar nga prokurori Mustafa Turku shprehu dakordësi me kërkesën e mbrojtjes.
“Gruaja vuan nga një sëmundje që kur e kapin krizat nuk i shërben dot fëmijëve. Gjykata në 5 muaj e ca ka arritur në konkluzionin konkret. Kushtet janë të përcaktuara, do mbajë lidhje me shërbimin e provës, Nuk do të paraqitet në shërbim prove por do të ketë kontakt, edhe nëse do ti duhet të lëvizë jashtë vendit për shkak të gjendjes së bashkëshortes. Ky vendim është i paapelueshëm”, tha avokati i Saimir Tahirit, Maks Haxhia. Ai shtoi se kushtet e tjera që mori parasysh gjykata për dhënien e vendimit, ishin vlerësimi se Tahiri s’ka rrezikshmëri shoqërore, i kanë ngelur më pak se dy vite dënim për të shlyer dhe ka të mitur në ngarkim.
Sipas vendimit të gjykatës, Tahiri lejohet që gjatë periudhës së qëndrimit në shtëpi të largohet nga vendbanimi tij për “plotësimin e nevojave të domosdoshme familjare për të cilat Shërbimi i Provës është dakord”.
Gjykata e Krimeve të Rënda e dënoi Saimir Tahirin me 5 vite burg për ‘Shpërdorim të detyrës’, por me gjykim të shkurtuar dënimi iu ul në 3 vite e 4 muaj burgim.
Vendimi u konfirmua më pas edhe nga Apeli në Shkurt 2022 dhe Saimir Tahiri përfundoi në qeli nga salla e gjykatës. “Gjykata ka konkluduar se i pandehuri Saimir Tahiri provohet tej çdo dyshimi të arsyeshëm se ka përfituar nga Moisi Habilaj dhe Artan Habilaj shërbime dhe përfitime të padrejta dhe se njëkohësisht shpërdorimi i detyrës ka dëmtuar interesat e ligjshëm të shtetit,” deklaroi gjyqtari Engert Pëllumbi në seancën e 4 Shkurtit.
Tahiri u dënua për “Shpërdorim detyre” duke i ‘shpëtuar’ akuzave fillestare për “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Ministër i Brendshëm gjatë mandatit të parë të qeverisë “Rama”, Saimir Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj – të afërm të Tahirit.
Vetë Tahiri ka mbajtur qëndrim mohues ndaj akuzave.
