Teksa tensionet në veri të Kosovës janë në kulmin e tyre, kryeministri Edi Rama është takuar me Presidentin e Serbisë Aleksandër Vuçiç, duke shmangur deri më tani një takim me liderët e Kosovës.
Takimin mes dyshes në Moldavi – ku po zhvillohet samiti i Komunitetit Politik Evropian – e ka bërë publik vetë Vuçiç. Përmes një postimi në rrjetet sociale, ai shpërndan disa foto ku shfaqet bashkë me Ramën dhe një mesazh, ku nënkupton se situata në Kosovë ishte temë diskutimi.
“Ne në rajon e dimë më së miri se sa e rëndësishme është që bashkërisht të bëjmë çdo përpjekje për të ruajtur paqen dhe stabilitetin e fituar me vështirësi. Diskutuam ngjarjet aktuale dhe hapat e mëtejshëm që do të kontribuonin në gjetjen e një zgjidhjeje për situatën aktuale të vështirë dhe serioze, me shpresën se arsyeja do të mbizotërojë, në të mirë të të gjithëve”, shprehet Presidenti i Serbisë, i cili vijon të akuzojë qeverinë e Kosovës për tensionet e krijuara në veri.
View this post on Instagram
Prishtina zyrtare nga ana tjetër, shprehet se e gjitha është një plan i Serbisë për të destabilizuar Kosovën.
Qëndrimin e përsëriti edhe këtë të enjte Presidentja e Kosovës Vjosa Osmani, e cila ndodhet në të njëjtin lokacion me Ramën. Megjithatë Rama nuk ka pasur asnjë takim deri më tani me Osmanin. Kryeministri i Shqipërisë, më herët, ka sulmuar qeverinë e Kosovës e drejtuar nga Albin për protestat dhe dhunën që po ushtrojnë serbët në Kosovë.
Situata ka sjellë reagime të shumta nga ndërkombëtarët, qëndrimet e të cilëve bashkohen teksa bëjnë apel për qetësim të situatës dhe bisedimeve mes Beogradit e Prishtinës. E ndërkohë që pritet një takim me Kurtin apo Osmanin për të shkuar ndoshta drejt normalizimit të situatës, Vuçiç zgjedh të takohet me Ramën.
