Apeli ka lënë në fuqi vendimin e Gjykatës së Tiranës, që detyron prokurorinë e rrethit të hetojë lidhur me kallëzimin e Ilir Metës ndaj Autoritetit të Dosjeve.
Në Korrik 2022, Autoriteti i Dosjeve Autoriteti për Informim mbi Dosjet e Ish-Sigurimit të Shtetit deklaroi se ka të dhëna se Ilir Meta ka qenë informator i sigurimit të Shtetit.
Meta e cilësoi deklaratën një tymnajë dhe bëri kallëzim në prokurori ndaj për drejtuesen e institucionit Genta Sula dhe 4 anëtarëve të këtij institucioni. Sipas Metës, ata kanë konsumuar 6 vepra penale: Falsifikim i Dokumenteve shtetërore; Falsifikimi kompjuterik; Falsifikimi i vulave, i stampave ose i formularëve; Shpërdorim Detyre; Përhapja e informatave te rreme që ngjallin panik; Zbulimi i akteve ose të dhënave sekrete; të kryera në bashkëpunim.
Sipas ish-kreut të Shtetit, dokumentat janë manipuluar, pasi personi Filip Talo, i cili pretendohet të jetë kallëzuar prej tij, në rrëfimin e bërë me shkrim dore për organet e sigurimit ka përmendur një tjetër emër, Ilir Murataj, me të cilin ndante dhomën e konviktit.
Prokuroria e Tiranës vendosi mos nisjen e hetimeve. Në arsyetimin e saj, Prokuroria arsyetoi se “rrethanat nuk lejojnë fillimin e procedimit” i cili parashikon ndër të tjera se një nga rrethanat është dhe “kur fakti nuk parashikohet nga ligji si vepër penale ose kur del qartë që fakti nuk ekziston”. Prokuroria shpjegoi më tej se “nisur nga çka përmban kallëzimi penal dhe për më tepër baza ligjore mbi të cilën ka operuar Autoriteti, bën të mosgjendemi para rrethanave për regjistrimin e procedimit penal, që lidhet me ekzistencën e figurës apo figurave të veprës apo veprave penale”.
Vendimi i akuzës u rrëzua nga Gjykata e Tiranës, që vlerësoi se vendimi është marrë në kundërshtim me ligjin dhe në një interpretim të ngushtë të nenit të cilit i është referuar për mosfillimin e hetimeve, duke konstatuar se ajo madje ka kryer disa veprime hetimore e për pasojë do të duhej të kishte bërë regjistrim penal për çështjen.
Prokuroria bëri ankim të vendimit të shkallëz së parë në Apel, që këtë të Enjte la në fuqi vendimin e Gjykatës së Tiranës.
