Ministrja e Arsimit, Evis Kushi bëri me dije këtë të Mërkurë se qeveria ka miratuar vendimin e kritikuar që vendos Akademinë e Studimeve Albanologjike nën varësi të Akademisë së Shkencave – institucion i drejtuar nga Skënder Gjinushi.
Gjatë fjalës së saj për mediat në foltoren e improvizuar para kryeministrisë pas mbledhjes së Këshillit të Ministrave, Kushi tha se vendimi i propozuar nga Ministria e Arsimit parashikon riorganizimin e studimeve albanologjike nga akademi në njësi autonome pranë akademisë së shkencave, me qëllim “që ta ngremë në një nivel të ri për sa i takon vlerave dhe identitetit tonë kombëtar”.
Kushi lëshoi kritika ndaj Akademisë së Studimeve Albanologjike, duke u shprehur se gjatë auditimeve nga ministria që ajo drejton janë gjetur paligjshmëri.
“S’ka pasur asnjëherë fakultet, që është detyrimi i parë ligjor. Në asnjë prej njësive përbërëse të saj s’ka mësimdhënie, që e bën të pamundur të vazhdojë të funksionojë si institucion. Akademia e Studimeve Albanologjike është e paakredituar si nga ana institucionale ashtu dhe nga ana e programeve të studimit. Ndërkohë që institucionet e tjera të arsimit të lartë po akreditohen për herë të dytë e të tretë. Madje edhe kur qeveria mori një kompani angleze për të akredituar institucionet e larta publike, Akademia e Studimeve Albanologjike ishte e vetmja që nuk u akreditua”, deklaroi ministria. Mosakreditimi, tha ajo, e bën të pamundur të lëshojë diploma referuar legjislacionit në fuqi. “Ka tetë vite që nuk regjistron asnjë student dhe kjo i bën pasive sipas ligjit të gjitha programet”, shtoi.
Kushi sulmoi dhe zërat që kanë dalë kundër kësaj nisme. “Jo që nuk zhduket albanologjia, por do marrë vendim që meriton atje ku e meriton që është institucioni më prestigjoz për shkencën në Shqipëri. Ata që bërtasin e kanë lejuar institutin të jetë në paligjshmëri. Janë pakicë ata që shkrehen kundër”, tha.
Nga ana tjetër, Akademia e Studimeve Albanologjike e ka cilësuar nismën e kthyer në vendim sot nga qeveria, si të paligjshme. Sipas tyre, synohet që institucioni të vendoset nën varësinë e Akademisë së Shkencave, duke e cilësuar si një ndërhyrje politike në kërkimin shkencor në vend.
Qëndrimin e përsëriti edhe këtë të Mërkurë pas njoftimit të vendimit të qeverisë nga Kushi. Në një reagim, Senati i Akademisë së Studimeve Albanologjike thotë se është plotësisht kundër, e cilëson një vendim politik që godet shkencën e albanologjisë në Shqipëri si dhe shton se është hartuar pa konsultime dhe pa transparencë. Akademia e Studimeve Albanologjike, thuhet më tej në reagim, do të vazhdojë misionin e saj për mbrojtjen e lirisë akademike duke përdorur të gjithë instrumentet ligjore të një shteti demokratik.
Një tjetër zë i njohur i rrethit akademik që ka kundërshtuar nismën ka qenë dhe Artan Fuga. Në një letër publike të postuar në faqen e tij në “FB” një ditë më parë, ai bëri thirrje për mosmiratimin e projektvendimit që e cilësoi “paçavure burokratësh të etur për pushtet”.
Ndërsa pas vendimit, Fuga u shpreh se kultura kombëtare ka marrë një goditje vdekjeprurëse.
