Teksa duhen edhe dy javë nga fundi i Superiores, gjithçka është e hapur për objektivin që kanë shumica e skuadrave, teksa priten 180 minuta të zjarrta për verdiktet, duke filluar nga kjo e enjte, e më pas për ta mbyllur të hënën e 29 majit.
Lufta për titull, me Tiranën që ka diferencë +2 pikë dhe Partizanin që pret një gabim të rivalit, duket e destinuar të bëhet edhe më dramatike.
Kalendari u rezervon bardhebluve dy përballje me skuadra që luajnë për të shpëtuar sezonin: Bylisin të enjten dhe Erzenin të hënën.
Nga ana tjetër, Partizani luan fillimisht ndaj Kastriotit, që vetëm matematika e mban në lojë për rënien direkte, ndërsa në fund pret Teutën, e cila lufton për të kapur vendin e katërt, që të jep një biletë europiane.
Gara për vendin e katërt – Finalja e Kupës këtë sezon është Tirana-Egnatia dhe këto dy skuadra kanë siguruar Europën, pasi janë në treshen e parë në renditje. Atëherë për një biletë në Ligën e Konferencës është futur në lojë vendi i katërt. Vllaznia, Teuta dhe Laçi janë në luftë për të kapur këtë pozicion, me shkodranët që kanë 46 pikë, durrsakët 45 dhe kurbinasit 44.
Të enjten luhet Vllaznia-Laçi dhe nga ana tjetër, Teuta pret Egnatian. Një barazim i mundshëm në “Loro Boriçi”, e shoqëruar me një fitore të durrsakëve, katapulton këta të fundit në vendin e katërt. Kuqeblutë do të hidhnin një hap të sigurt për Europën nëse mundnin bardhezinjtë, duke pasur parasysh edhe kalendarin e rivalit në javën e fundit, pasi Teuta luan ndaj Partizanit që lufton për titull. Shkodranët duan të evitojnë surprizat në fund, pasi janë të ndërgjegjshëm se i pret një transfertë delikate në Ballsh në javën e fundit.
Shanset janë të mëdha edhe për Laçin nëse i fiton të dyja ndeshjet e mbetura, edhe pse nuk e ka çdo gjë në dorën e vet, pasi i duhet të presë edhe gabimin e Teutës për të siguruar vendin e katërt. Gjithçka mbetet e hapur për Vllazninë, Teutën dhe Laçin në të gjithë skenarët, por në fund dy prej këtyre skuadrave do të “digjen”.
“Play Out” dhe Rënia- Dy skuadra bien direkt (9 dhe 10), ndërsa vendi i tetë zhvillon një ndeshje “play out”-i për qëndrimin në Superiore me fituesen e “play off”- it të Kategorisë së Parë. Aktualisht në luftë për mbijetesë janë katër skuadra mes “play out” dhe rënies direkte: Kukësi 41 pikë, Erzeni 39 pikë, Bylisi 37 pikë dhe Kastrioti me 35 pikë.
Krutanët i mbanë në lojë vetëm matematika dhe varianti më i çmendur që ata të shpëtojnë është që të fitojnë të dyja ndeshjet e mbetura ndaj Partizanit dhe Laçit, ndërsa nga ana tjetër Bylisi dhe Erzeni të humbin në dy javët e fundit.
E enjtja mund të vendosë shumë, pasi ka përballje direkte Kukësi-Erzeni. Në rast se shijakasit fitojnë në Kukës dhe Bylisi e Kastrioti munden respektivisht nga Tirana e Partizani, atëherë ballshiotët dhe krutanët bien direkt nga Superiorja (me këtë variant mbetet i hapur më pas vetëm ekipi që do të shkojë në “play out” mes Kukësit dhe Erzenit). Por, nëse Kukësi thyen shijakasit këtë javë, ikën përfundimisht nga rreziku i “play out”-it. Janë disa kombinime rezultatesh që mbajnë të hapur gjithçka për të katërta skuadrat.
