Misteri i vdekjes në spital të 27 vjeçarit, Jani Rustemi, vijon të jetë ende i pazbardhur, ndërsa Prokuroria e Tiranës ka nisur ditën e sotme hetimet mbi rastin.
Edhe pse nga verifikimi paraprak, burimet thonë se nuk ishin evidentuar shkelje, humbja e jetës së të riut, pritet të shoqërohet me një verifikim të thelluar jo vetëm për pretendimet për dhunë, por edhe për kohën e dhënies së ndihmës mjekësore dhe nëse ajo ka qenë e duhura.
Familjarët e 27-vjeçarit kanë dalë për të protestuar këtë të Hënë para Ministrisë së Drejtësisë, ku kanë bërë thirrje që të zbardhet e vërteta, pasi pretendojnë se i riu është dhunuar nga policia.
“Duam të drejtën kush na e ka vrarë. Duam drejtësi. Po na vret shteti. Ju lutem shqiptarëve, sot më ndodhi mua, nesër mund t’i ndodhë një tjetri, të çohemi të gjithë për të drejtat e fëmijëve tanë, motrave tanë. I bëj thirrje kryeministrit të bëjë drejtësi”, tha kunati i Rustemit, Lulzim Mehmeti, në një prononcim për mediat.
Familjarët shprehen se kur ishin në spital, nuk i lejonin që të shihnin djalin dhe pasi ka ndërruar jetë pretendojnë se kanë vënë re shenja dhune në trupin e tij.
“Kontrollova djalin dhe ka pasur dhëmbin e thyer dhe pjesën e veshit të nxirë. Në Spital nuk na lejonin ta shikojmë. Nuk e dimë se s’na lejonin ta shohim. Do të vazhdojmë protestat dhe do të kërkojmë të drejtën kudo. Policia nuk ka të drejtë të prekë një njeri me dorë. Çfarëdolloj krimi të kenë bërë. Askush s’ka të drejtë të dhunojë askënd”, tha e ëma e të riut që humbi jetën.
Dinamika e ngjarjes?
Jani Rustemaj u arrestua më 13 prill, pasi akuzohej si autor i grabitjes së një tapeti dhe një palë atleteve.
Sipas policisë së Tiranës, më 14 prill, gjatë qëndrimit në bllokun e sigurisë në rrugën “Mine Peza” ka shfaqur probleme shëndetësore. Është njoftuar shërbimi i emergjencës mjekësore, – thotë policia – të cilët janë paraqitur në ambientet e Bllokut të Sigurisë dhe pas ndihmës mjekësore të dhënë, gjendja e tij është përmirësuar”.
Sipas kartelës mjekësore të riut i është dhënë metadon për qetësim, pasi prej varësisë nga heroina ka nisur të ndihet keq. Një ditë pasi dyshohet të ketë pirë metadon, më 15 prill Jani Rustemaj është dërguar në gjykatë, ku pavarësisht gjendjes shëndetësore që kishte kaluar, togat e zeza i vendosën masën e sigurimit personal të arrestit me burg. Më 16 prill, 27-vjeçari është dërguar në paraburgim te 313-a, por autoritetet e burgut, “nuk kanë pranuar që ta marrin në dorëzim – thotë zyrtarisht policia- për shkak të mbingarkesës në këtë institucion dhe në këto kushte ai është rikthyer dhe vendosur përsëri në Bllokun e Sigurisë Tiranë”. Më 17 prill i riu i arrestuar ka shfaqur përsëri shqetësime shëndetësore dhe pas ardhjes së emergjencës shëndetësore është transportuar në spitalin “Nënë Tereza”, ku ndodhej në gjendje kome derisa ndërroi jetë.
