Kreu i Partisë Demokratike, Sali Berisha ditën e sotme ka publikuar një denoncim ku tregohet kërcënimi që bëjnë njerëz të veshur me “petkun” e pushtetin ndaj qytetarëve ditën e zgjedhjeve të 14 majit.
Gjatë një postimi në rrjetet sociale, Berisha ka publikuar një audio-përgjim, teksa shprehet se banditët e drejtuar nga zv kryeministrja Belinda Balluku kanë kërcënuar qytetarët në këmbim të votës.
I moshuari në audo thotë se; Më thanë që; “ose duam votën, ose do të vrasim”. Sipas Berishës, ky është kërcënim i bërë nga vartësit e Ballukut ndaj një 80-vjeçari në fshatin Bruç të Matit duke e cilësuar denoncim tronditës.
Denoncimi i plotë nga Sali Berisha:
Votën ose kokën!
Ky është kërcënimi që banditë të Ballukut i bënë 80 vjeçarit Arif Këputa në fshatin Bruç të rrethit Mat!
Dëgjojeni denoncimin e tij tronditës!
Lexoni mesazhin!
“Dua te dennoncoj qe punonjësi i OST ne Mat z.Sajmir Hysa sebashku me shtetasin Ferit Neziri kanë kërcenuar nje qytetar ne fshatin Bruç,Nj.As Rukaj Bashkia Mat, pasi kanë kercenuar qytetarin Arif Keputa se nese nuk votojne per Agron Malaj do tju bejme cope cope. Ju kujtoj se Z.Arif Keputa eshte i moshes 80 vjec bashke me bashkshorten. Degjoni bisedën”
- Berisha e cilësoi 14 majin si “masakër elektorale”
Ish-kryeministri Sali Berisha së bashku me kreun e Partisë së Lirisë, Ilir Metën nuk njohën rezultatin e zgjedhjeve të 14 majit për të cilën pohuan se u manipulua nga qeveria e Edi Ramës.
Berisha theksoi ditë më parë se shit-blerjen e votës nga mazhoranca ishin “kryefjala e 14 majit”, ndërsa shtoi se në tregun e zi, shuma e blerjes së votës arriti deri në 600 euro.
Berisha gjithashtu ka akuzuar kryeministrin Edi Rama se ka përdorur administratën, ndërsa nuk i kurseu kritikat ndaj ministres Belinda Balluku, duke e akuzuar këtë të fundit se në Peshkoni, bandat elektorale ishin në mbrojtjen e saj.
Procesi zgjedhor për Berishën ishte një farsë dhe këtë kryedemokrati e argumentoi duke iu referuar raportit paraprak të OSBE-ODIHR për shkeljet e hasura gjatë votimeve, të cilat lidheshin me shit-blerjen e votës, presionin ndaj administratës dhe votimin në grup ose familjar.
