Vizita e kryeministrit Edi Rama në Shkodër gjatë ditës së sotme, është cilësuar nga kryebashkiaku në largim Bardh Spahia si një rikthim në vendin e krimit.
Komentin e tij në Facebook, Spahia e lidh me masakrën elektorale që u bë sipas tij në zgjedhjet lokale të 14 Majit, me vota të blera, intimidim dhe shantazhe mbi zgjedhësit në kryeqendrën e Veriut.
Kandidati humbës i koalicionit “Bashkë Fitojmë” shprehet kritik edhe për fjalën e mbajtur nga Rama brenda Muzeut të Kujtesës, ndërsa nënvizon se me të njëtat skema si paraardhësit komunist, kryeministri i vërsuli krimin Shkodrës për ta gjunjëzuar.
REAGIMI I SPAHISË:
Pas masakrës zgjedhore të 14 Majit, Edi Rama u rikthye në vendin e krimit. E bëri duke nisur nga një vend që kurrë nuk do të duhej të hynte brenda pa kërkuar më parë ndjesë. Vendi i Dëshmisë dhe Kujtesës nuk mund të jetë një hapësirë që kryeministri mund të dhurojë shoë-n e radhës në sytë e shkodranëve dhe shqiptarëve, pasi ai nuk e kupton peshën e rëndë që ka ai vend dhe ajo godinë.
Për shumë familje brenda asaj hapësire dëshmohen vuajtjet e torturat çnjerëzore që kaluan të afërmit e tyre, bij e bija të Shkodrës. Nuk ka si ta dijë një kryeministër që vjen nga një familje e nomenklaturës komuniste. E bën që Shkodrës t’ja dëshmojë në çdo kohë e në çdo formë urrejtjen patologjike që ka për të, pasi nuk ka të ngopur nga dhunimi që kërkon t’i bëjë qytetarisë shkodrane.
Me të njëjtat skema si paraardhësit e tij, Edi Rama në 14 Maj i vërsuli Shkodrës krimin, paratë e pista, administratën patronazhiste, policinë politike dhe çdo instrument tjetër për ta nënshtruar, duke i tjetërsuar vullnetin e lirë qytetarëve të saj. E sot me shfaqjen e tij në rrugët e Shkodrës, përmes të njëjtave forma presioni e dhunimi certifikon krimin elektoral që prodhoi vetëm 5 ditë më parë.
Ai dhe shpura e tij harrojnë se Shkodra nuk i është nënshtruar asnjëherë të keqes dhe gjithmonë përballë saj ka dalë më e fortë.
