Më 27 prill, kur na ndanin rreth dy javë nga zgjedhjet lokale të 14 Majit, ministrja e Bujqësisë Frida Krifca si kurrë më parë njoftoi shpërndarjen e milionave të radhës si subvencione për naftën në kuadër të programit IPARD – që synon mbështetje financiare për bujqësinë dhe zhvillimin rural kryesisht nga fondet e BE-së (75%) dhe qeverisë shqiptare (25%).
Nga Lushnja, ministrja tha se fermerët, fondet e skemës kombëtare, që shpeshherë janë atakuar se shkojnë për persona pranë pushtetit, do t’i marrin më shpejt këtë vit, më saktësisht vetëm një javë para zgjedhjeve lokale.
Mbi 2000 fermerë, kryesisht nga bastionet e majta si Fieri, Lushnja, Vlora, Divjaka dhe Korça tërhoqën naftën falas, që në kuadër të programit IPARD III, do të arrinte në vlerën 146 milionë euro deri në pranverës.
Por pavarësisht se nafta pa akcizë u bë pjesë e makinerisë elektorale të PS, duke u shndërruar në burim votash për Ramën, fermerët e Maliqit vetëm pesë ditë pas zgjedhjeve i kanë kërkuar qeverisë që t’i ndihmojë, pasi as nafta që ajo subvencionon nuk u shërben.
Kjo pasi, ata argumentojnë se janë rritur çmimet e produkteve bujqësore. Fermerët e Maliqit shprehen se kanë vendosur që të mbjellin miser dhe grurë, duke hequr dorë nga mbjellja e produkteve të tjera. Disa prej tyre gjithashtu i kanë lëshuar tokat me qira, pasi nuk kishin asnjë përfitim me kulturat që mbillnin.
Nga ana tjetër fermerët përmendin faktin se çdo investim që i bëjnë tokës si vaditje apo punim përdorin naftën dhe këto shpenzime janë më të mëdha me atë çka jep qeveria. Madje disa prej fermerëve e kanë lëshuar tokën me qira.
Fermerët e zonës së Maliqit kultivojnë kultura të ndryshme bujqësore ku sipërfaqe të mëdha zenë edhe gruri e misri i cili vitin që kaloi ska pasur treg. Ata ndihen të pasigurt nga ana e qeverisë pasi sipas tyre as në raste fatkeqësish natyrore si vitin e kaluar nuk pati dëmshpërblime për dëmet e shakaktuara.
