Të dielën të 14 majit qytetarët në të gjithë Shqipërinë iu drejtuan kutive të votimit për të zgjedhur kryebashkiakët që do të qeverisin pushtetin lokal për katër vitet e ardhshme.
Duke iu referuar raporteve ndërkombëtare edhe këto zgjedhje nuk ishin në standardin e kërkuar pasi u evidentuan shumë problematika, nga përdorimi i resurseve të administratës në funksion të fushatës elektorale deri tek shit-blerja e votës.
Prokuroria e Përgjithshme ditën e sotme ka dalë me një informacion mbi veprat penale të kryra në fushën e zgjedhjeve, ku në total rezultojnë 31 kallëzime në rang vendi. Organi i akuzës bën me dije se janë regjistruar 18 procedime penale, dhe janë prangosur në flagrancë 6 persona, 2 në Sarandë, 2 në Tiranë, 2 në Vlorë.
“Në vijim të masave administrative dhe procedurale të ndërmarra nga Prokurori i Përgjithshëm për të garantuar funksionimin normal të prokurorisë në përputhje me detyrimet kushtetuese dhe ligjore për periudhën para dhe pas zgjedhore, prokuroria është angazhuar për hetimin e veprave penale në fushën e zgjedhjeve, në kompetencë lëndore të juridiksionit të përgjithshëm”, njofton Prokuroria e Përgjithshme.
Deri në datën 18.05.2023 Prokuroritë e Shkallës së Parë të juridiksionit të përgjithshëm kanë raportuar pranë Prokurorisë së Përgjithshme, mbi veprat penale që prekin zgjedhjet e lira dhe sistemin demokratik të zgjedhjeve si më poshtë:
• Janë paraqitur 9 kallëzime nga subjekte politike dhe institucione dhe 21 referime nga policia gjyqësore e Drejtorive Vendore të Policisë dhe e Komisariateve të Policisë.
• Janë regjistruar gjithësej 31 kallëzime penale. Prej të cilave:
5 kallëzime penale në Prokurorinë e Elbasanit;
4 kallëzime penale në Prokurorinë e Vlorës;
4 kallëzime penale në Prokurorinë e Beratit;
3 kallëzime penale në Prokurorinë e Durrësit;
3 kallëzime penale në Prokurorinë e Kukësit;
3 kallëzime penale në Prokurorinë Gjirokastër;
2 kallëzime penale në Prokurorinë Fier;
2 kallëzime penale në Prokurorinë e Dibrës;
2 kallëzime penale në Prokurorinë Tiranë;
1 kallëzim penal në Prokurorinë e Korçës;
1 kallëzim penal në Prokurorinë Shkodër; dhe
1 kallëzim penal në Prokurorinë Sarandë.
• Janë regjistruar gjithsej 18 procedime penale për veprat penale të parashikuara nga nenet 326/a, 327/1, 328, 328/a/1, 329, 330, 331/a, 190, 248, 84 të Kodit Penal. Prej të cilave 4 në Prokurorinë e Elbasanit, 1 në Prokurorinë e Korçës, 1 në Prokurorinë e Kukësit, 4 në Prokurorinë e Beratit, 1 në Prokurorinë e Fierit, 1 në Prokurorinë e Shkodrës, 1 në Prokurorinë e Vlorës, 2 në Prokurorinë e Gjirokastër, 1 në Prokurorinë e Sarandës dhe 2 në Prokurorinë e Tiranës.
• I është atribuar vepra penale 25 personave.
• Janë arrestuar në flagrancë 6 persona, prej të cilëve 2 në Sarandë, 2 në Tiranë, 2 në Vlorë.
• Është caktuar si masë sigurimi “arrest në burg”, vetëm për një person nga Prokuroria Vlorë.
• Janë kaluar për kompetencë hetimi në Prokurorinë e Posaçme Kundër Korrupsionit dhe Krimit të Organizuar 3 procedime penale, 2 nga Prokuroria Berat dhe 1 nga Prokuroria Vlorë.
- Berisha i ka cilësuar “masakër elektorale” zgjedhjet e 14 majit, problematika e blerjes së votës:
“Masakër elektorale” e ka etiketuar Sali Berisha zgjedhjet lokale të 14 majit duke ngritur akuza të forta ndaj qeverisë e cila sipas tij ka manipuluar votën e shqiptarëve.
Pas përfundimit të numërimit Partia Socialiste ka fituar shumicën e bashkive në zgjedhjet vendore duke siguruar 53 bashki, koalicioni ‘Bashkë Fitojmë’ 7 bashki dhe 1 bashki MEGA.
Pas humbjes, kreu i Partisë Demokratike Sali Berisha ka refuzuar të pranojë rezultatin e zgjedhjeve lokale të 14 Majit, duke u shprehur se qytetarët u intimiduan nga grupet e bandave të stacionuar pranë qendrave të votimit dhe e shprehën vullnetin e tyre nën presion dhe shantazh konstat.
Procesi zgjedhor për Berishën ishte një farsë dhe këtë kryedemokrati e argumentoi duke iu referuar raportit paraprak të OSBE-ODIHR për shkeljet e hasura gjatë votimeve, të cilat lidheshin me shit-blerjen e votës, presionin ndaj administratës dhe votimin në grup ose familjar.
Në krahun tjetër kreu i Partisë së Lirisë, Ilir Meta tha se po përgatitet “dosja” që dokumenton se qeveria shkatërroi procesin zgjedhor më 14 maj e cila për pasojë solli edhe humbjen e koalicionit “Bashkë Fitojmë” në bashkitë kryesore të vendit.
Gjithashtu, Berisha denoncoi shit-blerjen e votës nga mazhoranca ndërsa shtoi se në tregun e zi, shuma e blerjes së votës arriti nga 300 deri në 500 euro.
