Kreu i Partisë Demokratike, Sali Berisha në një tjetër dalje publike para mediave denoncoi sërish se në zgjedhjet e 14 majit mazhoranca në pushtet përdori administratën për tjetërsimin e votës.
Gjithashtu, Berisha tha se gjatë fushatës janë shpërndarë miliona lekë tek qytetarët në mënyrë që blinin votën për kandidatët e qeverisë në pushtet.
Ai tha se përmes shtimit të pensionistëve, shpërblimet për personat në nevojë, punësimet, mazhoranca i përdori si formë për marrjen e votave, në kundërshti të plotë me ligjet e vendit. Gjatë fjalës së tij, Berisha denoncoi shit-blerjen e votës nga mazhoranca ndërsa shtoi se në tregun e zi, shuma e blerjes së votës arriti nga 300 deri në 500 euro.
“Për blerjen e votës, mbi 20 mijë qytetarë u shtuan në listën e ndihmës ekonomike në mbarë vendin dhe mbi 10 mijë të tjerë u paguan si punonjës të përkohshëm pa kontratë. Vetëm në Peshkopi u disbursuan 400 milionë lekë për individë me aftësi ndryshe. Fondi i ndihmës ekonomike dhe pagesat për aftësi ndryshe u rritën në këtë fushatë me 900 mln lekë në krahasim me vitin e kaluar.
Nga të gjitha këto shuma të marra së bashku, rezultuan se përfituan rreth 850 mijë qytetarë me të drejtë vote, me qëllimin e vetëm të blerjes së votës. Përveç këtyre fondeve, u përdorën edhe forma të tjera antiligjore si subvencione, prokurime, tendera për të blerë votën e shqiptarëve. Të gjitha këto në kundërshtim me Kartën e Kopenhagenit, Kodin Zgjedhor, etj.
Me qëllim të blerjes së votës, kryetari në ikje i Vaut të Dejës, subvencionoi 400 mln lekë për një kompani, akt që e ka tagër vetëm Këshilli i Ministrave dhe bazuar vetëm në ligjin e ndihmës shtetërore. Por nuk ishin vetëm këto shuma të taksapaguesve për blerjen e votës. Kodi Zgjedhor ndalon prokurimet publike dhe koncesionet në vend, por gjatë farsës elektorale 2023 u bënë qindra tendera me një vlerë 6 miliardë lekë dhe u dhanë disa investime strategjike. Përveç këtyre, mbi 4 miliardë lekë u tenderuan për ndërtimin e banesave nga tërmeti. U konstatuan qindra raste investimi me zhavorr elektoral, duke kulmuar në Tiranë.
Të gjitha këto shuma të shpërndara për të blerë haptas votën, janë vetëm maja e ajsbergut e shumës së shpërndarë nën dorë në tregun e zi të votës me destinacion direkt blerjen e të drejtës së votës. Në këtë rast kriminelët elektoralë paguajnë qytetarin që të mos ushtrojë të drejtën e votës. Në rastin tjetër ata paguajnë qytetarin për të votuar kandidatin socialist. Në tregun e zi, shuma e blerjes së votës arriti nga 300 deri në 500 euro. Cila është kjo shumë totale që u përdor për të blerë votën e shqiptarëve? Është shumë e vështirë të gjendet, por ndoshta kurrë nuk mësohet”, tha fillimisht Berisha.
Gjithashtu, Berisha përmendi krizën që pësoi monedha europiane, teksa theksoi se rënien e euros mund ta provokojnë vetëm hedhja e qindra milionë eurove në një kohë të shkurtër për këmbim.
“Ajo që dihet është se euro arriti nivele të ulëta këmbimi me lekun. Burimet kompetentë na thonë se një rënie e tillë e euros mund ta provokojnë vetëm hedhja e qindra milionë eurove në një kohë të shkurtër për këmbim. Rritja e euros fill pas përfundimit të zgjedhjeve, hodhi poshtë pretendimin se rënia lidhej me sezonin turistik. Kulmin e ka arritur në Shkodër. Shikoni fenomenin Doshi. Ky është fenomeni Dushku i vitit 2023. Pra, këto zgjedhje ishin të blera dhe për blerjen e tyre u përdorën qindra milionë euro nga taksat e shqiptarëve. Ndërkohë që opozita dhe jo pseudopozita nuk ka paguar një qindarkë nga xhepi. Këto zgjedhje janë të blera sepse narkoeurot u bënë diktuesit kryesorë të rezultatit”, vijoi Berisha.
- Sot takimi Berisha – Meta ne seline e PD-së
Kujtojmë që deklarata për mediat e Sali Berishës vjen pas një takimi që zgjati rreth 1 orë në selinë blu me kreun e Partisë së Lirisë, Ilir Metën. Gjatë një komunikimi me gazetarët, Meta tha se po përgatitet “dosja” që dokumenton se qeveria shkatërroi procesin zgjedhor më 14 maj e cila për pasojë solli edhe humbjen e koalicionit “Bashkë Fitojmë” në bashkitë kryesore të vendit.
Gjithshtu Meta i etiketoi si “gomerë” kandidatët socialistë të vendosur nga kryeministri Edi Rama për të cilët tha se “nuk do të kenë mundësi që të vjedhin më ashtu siç kanë bërë këto 4 vite”.
