Vdekja e shqiptarëve të përfshirë në trafikun e drogës në Spanjë, kryesisht rajoni i Katalonjës, është kthyer në një problem madhor për autoritetet.
Një tjetër ngjarje e rëndë është regjistruar së fundmi, ku viktima raportohet të jetë një 29-vjeçar shqiptar që punonte si “kopshtar” në një shtëpi bari.
Hetimi nisi pas një denoncimi që ishte bërë për zhdukjen e 29-vjeçarit nga të afërm të tij dhe policia katalanase gjatë kontrolleve zbuluan një plantacion kanabisi dhe gjithashtu u arrestua një 52-vjeçar, shtetas spanjoll.
Mossos d’Esquarda, që po koordinon hetimet ka arritur në përfundimin se shkak për vdekjen e tij është bërë trafiku i lëndëve narkotike.
Më tej gjatë hetimeve, autoritetet zbuluan edhe vrasjen e të riut, trupi i të cilit kishte plagë të shumta, kryesisht në kokë. Mediat spanjolle raportojnë se i riu është gjetur i pajetë në një zonë të pyllëzuar në Santa Coloma de Farners, ku është hedhur nga autori i vrasjes.
Hetuesit pasi gjetën trupin e të riut u kthyen sërish në shtëpinë ku ai punonte si kopshtar.
Më 8 prill, partneri i tij në “biznes”, 52-vjeçarit me kombësi spanjolle, i cili tashmë ishte arrestuar iu komunikua akuza si autori i dyshuar i vrasjes së të riut shqiptar.
Siç ka mësuar ElCaso.com, nga burime të hetimit, sherri ka nisur për një borxh qesharak. I moshuari ka akuzuar të riun se i ka vjedhur 5 euro.
Përleshja është përshkallëzuar derisa dyshohet se i arrestuari i ka hapur kokën të riut me çekiç, duke i shkaktuar vdekjen dhe më pas e ka hedhur në pyll.
Të enjten e kaluar, më 11 maj, pasi qëndroi dy ditë në komisariatin e Santa Coloma, 52-vjeçari spanjoll u dorëzua te gjyqtari, i cili vendoste ta linte në burg.
Ky nuk është krimi i parë i këtij viti që lidhet, në një mënyrë apo tjetër, me kultivimin dhe trafikimin e kanabisit në Katalonjë. Në ditën e “Sant Jordi”, një tjetër i ri shqiptar u la në grahmat e fundit të jetës para spitalit Trueta në Girona. Ndërkohë, më herët në mars, një burrë u gjet i vdekur në një shtëpi bari në Cantallops.
