Policia e Sarandës ka zbuluar një tjetër rast të kultivimit të brendshëm të bimëve narkotike. Operacioni është ende në vijim në lagjen nr. 2 të qytetit, në kryqëzimin e rrugëve “Adem Sheme” dhe “Pandeli Boçari”.
Sipas burimeve, një apartament në një pallat disakatësh ishte përshtatur për kultivimin e marijuanës me metoda të avancuara të brendshme.
Hetimet paraprake sugjerojnë se pas këtij aktiviteti fshihet i njëjti grup kriminal që dyshohet se ka lidhje edhe me një tjetër “shtëpi bari” të zbuluar më 10 janar në lagjen nr. 1, në rrugën “Butrinti”.
Në rastin e parë, policia arrestoi një person ndërsa një tjetër u shpall në kërkim. Autoritetet besojnë se të dyja rastet janë pjesë e të njëjtit rrjet të organizuar që operon në qytet.
Detaje të tjera pritet të bëhen publike në orët në vijim, ndërsa operacioni vijon me intensitet në zonën e identifikuar.
