Në prag të zgjedhjeve presidenciale, një numër liderësh autokratikë në botë kanë shprehur mbështetjen e tyre të hapur ose jo për presidentin turk, Erdogan.
Gazeta greke, Kathimerini në një opinion të Stavros Tzimas shkruan se një humbje e Erdoganit do lëkundte këtë aleancë autokratësh.
“Rexhep Taip Erdogan po përballet aktualisht me kohë sfiduese dhe përkrah tij, liderë autoritarë nga e gjithë bota janë të shqetësuar për fatin e tij. Sondazhet e fundit tregojnë se ai është në prag të humbjes së zgjedhjeve të 14 majit. Nëse kjo ndodh, do të nënkuptonte një humbje të konsiderueshme për rrjetin global të liderëve autokratikë, pasi Erdogan konsiderohet një yll i ndritshëm në atë galaktikë.
Vladimir Putin, Aleksandër Lukashenko, Ali Khamenei, Kim Jong Un, Xi Jinping, së bashku me liderë të tjerë në botën arabe dhe Azi, si Nikolas Maduro në Amerikën Latine, bashkë me Erdogan, kanë krijuar aleanca në vitet e tyre për të ndërtuar një ‘botë të re’, që përputhet me regjimet e tyre autokratike.
Kjo përpjekje e bashkërenduar është në kundërshtim të drejtpërdrejtë me vlerat perëndimore dhe sistemet demokratike liberale që qëndrojnë në rrugën e tyre. Një disfatë e Erdoganit do të minonte koalicionin e tyre,” shkruan gazetari.
Sipas tij, kësaj aleance i është bashkuar edhe Edi Rama i Shqipërisë. Por gazetari shkruan se ka zëra se bëhet fjalë për detyrime financiare në këtë rast.
“Besnikërinë ndaj liderit turk e ka deklaruar edhe kryeministri i Shqipërisë, Edi Rama. Çfarë ka ai për të ofruar? Ai e ofron Shqipërinë si bazë islamike të Turqisë në Ballkan, edhe pse publikisht shpreh dëshirën e tij që Shqipëria të bëhet anëtare e BE-së. Madje disa zëra në Shqipëri sugjerojnë se ka detyrime financiare. Të gjithë këta do të pikëllohen thellë nëse Erdogan mposhtet,” e mbyll shkrimin gazetari.
