Fushata elektorale ka hyrë në ditët e saj të fundit, teksa të dielën shqiptarët do të votojnë për të zgjedhur 61 kryebashkiakët e rinj të vendit.
E dominuar në një anë nga shpalosja e programeve kokrete për zhvillimin e qyteteve dhe në krahun e socialistëve me fyerje në drejtim të rivalëve, në retorikën politike që kryesohet nga kryeministri Edi Rama, qytetarët do të vendosin për 4 vitet e ardhshme.
E teksa Rama nga Kavaja kërkoi që demokratët “të flenë gjumë dhe të mos votojnë të dielën”, për kandidatin e koaliconit opozitar “Bashkë Fitojmë” Fisnik Qosja kjo nuk është zgjidhja.
Nga takimi përmbyllës elektoral përkrah kryedemokratit Sali Berisha, Qosja i kujtoi Ramës se qytetarët e Kavajës nuk tremben nga horrat dhe banditët.
Qosja u shpreh se më 14 maj Kavaja do të votojë për demokracinë dhe do të përzënë njëherë e mirë, ata që kanë zaptuar Kavajën.
“Të nderuar qytetarë të Kavajës, ju falënderoj për mbështetjen që më keni dhënë. Kemi shkelur në çdo cep të Kavajës, jemi takuar me çdo mësues, doktor, mjek e infermierë. Të përzëmë njëherë e mirë këta që kanë zaptuar Kavajën. Unë sot vij me një program për bujqësinë, arsimin, për rrugën e bregdetin. Ne jemi serioz në rrugën tonë, kemi folur me fakte. Do t’i kthejmë dinjitetin Kavajës. Kavaja nuk trembet nga banditët dhe nga horrat. Kavaja voton me zemër, për demokracinë. Jam krenar që sot jam përpara jush, jemi pak ditë para zgjedhjeve, të trokasim në çdo derë, Kavaja është e qytetarëve, fitorja është e Kavajës. Fitore”, tha Fisnik Qosja.
