Kryedemokrati Sali Berisha gjatë takimit përmbyllës elektoral në Kavajë ku kërkoi votën për kandidatin e koalicionit opozitar “Bashkë Fitojmë”, Fisnik Qosja, i bëri thirrje kryeministrit Rama të ndalë presionet ndaj qytetarëve.
Kur na ndajnë ditë nga zgjedhjet, Berisha iu drejtua me një mesazh të fortë edhe Erion Veliaj, i cili paraqitet në Kavajë si drejtues politik i qarkut të Tiranës.
“Erion Veliaj është një turp jo vetëm për rrugët e Tiranës, jo vetëm për rrugët e Kavajës, por është turp kudo që ecën. Dhe vjen këtu për të rrëmbyer votat e Kavajës. Erion, larg duart nga Kavaja! Kavaja nuk shitet dhe nuk blihet kurrë”, u shpreh Berisha në mesazhin që i drejtoi kryebashkiakut të Tiranës.
Një sfidë të hapur Berisha e rezervoi edhe për Ramën, duke kërkuar nga kryeministri që të mos vazhdojë duke mashtruar qytetarët me zotime për rritje të madhe rrogash dhe pensionesh, por të hapë Parlamentin për t’a votuar ligjin që bëri tinëz.
“Bëri një ligj, por e mbylli parlamentin. E ftoj sërish nesër, hajde të votojmë ligjin e rrogave dhe pensioneve. Por ti je mashtrues. Atë nuk e lidh asgjë me këtë komb dhe këtë popull. Ti je një pushtues i përçudnuar që mendon për miliardat e tua dhe të klientelës tënde. Edi Ramën e pret miku i tij, tradhtari i kombit amerikan, McGonigal. Socialistë të Kavajës, larg tij se dita erdhi dhe ai do shkojë në burg me McGonigal. Edi Rama ka dhjetëra çështje në Shqipëri, është kryekrimineli i votave, është kryekrimineli i vendit!”, nënvizoi Berisha.
