Komisioni Qendror i Zgjedhjeve ka përfunduar të gjithë bazën materiale të nevojshme për zgjedhjet e ’14 Majit’.
Ilirjan Celibashi, në një dalje për mediat, bëri të ditur se kanë përgatitur një aplikacion ku çdo qytetar mund të raportojë problematikat që vëren në qendrën e tij të votimit. Ai tha sot se problematikat e raportuara do të jenë të disponueshme edhe për mediat, të cilat mund ti ndjekin më pas rastet.
“Kushdo mund të ngarkojë në aplikacion të gjithë problematikën që sheh në ditën e zgjedhjeve”– tha Celibashi.
Sa i takon fletëve të votimit, Celibashi tha se ato janë marrë sot në dorëzim nga KQZ, dhe më tej pritet që të bëhet dhe shpërndarja e tyre.
Celibashi tha se me vendim të qeverisë, kartat e identitetit të cilat skadojnë deri në 14 maj, do të jenë në vlefshme ditën e zgjedhjeve për të bërë të mundur votimin e tyre.
Celibashi tha se për 38 kandidatë është kërkuar një hetim i thelluar pasi ka pasur indicie apo denoncime se kandidimi i tyre është bërë në shkelje me ligjin. 10 prej kandidatëve që kërkohet një hetim i thelluar garojnë për kryetarë bashkie dhe 28 të tjerë për këshillat bashkiakë.
“38 kandidatë nga mbi 23 mijë kandidatë për kryetarë bashkie dhe anëtarë të këshillit bashkiak, të cilët KQZ-ja në bazë të asaj që kanë deklaruar, por edhe indiciet e marra nga partitë, kemi vendosur të kërkojmë verifikim të thelluar nga prokuroria. Janë 10 kandidatë për kryetarë bashkie që janë dërguar për hetim të thelluar”- tha ai.
Po ashtu, Celibashi bëri të ditur se Partia Demokratike nuk ka sjellë anëtaret e komisioneve për 422 qendrat e votimit si dhe PL për 75 të tilla.
“PD nuk ka sjellë anëtarët e komisioneve për 422 qendra votimi, PL nuk i ka sjellë në 75 qendra votimi“- tha Celibashi.
