Thirrja për një debat përpara qytetarëve në prag të zgjedhjeve të 14 majit, është përsëritur sërish nga Sali Berisha në drejtim të kryeministrit Edi Rama.
Teksa prezantoi kandidatët për kryebashkiakë të koalicionit “Bashkë Fitojmë” për Klosin e Matin, Berisha sfidoi hapur Ramën, duke kërkuar një ballafaqim për tenderat e qeverisë së djathtë nga viti 2005 deri në 2013 dhe atyre që ka firmosur “Rilindja” në 10 vitet e fundit.
“I them Edi Ramës që kalon nga takimi në takim me një fjalor të padenjë, një fjalor tipik për halabakët, i them hajde këtu në Mat, ja ku janë këta qytetarë, dil këtu me Sali Berishën dhe t’u faktojmë pak këtyre qytetarëve se nuk po hyjmë në ato që kemi realizuar anëtarësimin në NATO, apo etj., etj., jo, t’u faktojmë këtyre qytetarëve se kush e ka përdorur pushtetin për t’u pasuruar vetë dhe kush ka menduar për qytetarët. Kaq. Cili nga ne të dy ka përdorur pushtetin për pasurimin e tij, nuk vjen dot, nuk ia mban, nuk del dot”, tha Berisha.
Sipas ish-kryeministrit Rama e ka të vështirë të pranojë një debat publik pasi ka të përfshirë në të gjitha aferat korruptive, familjarët e tij.
“Po pse nuk del. Edhe unë kam familjarë edhe ai ka familjarë. Dallimi është si nata me ditën se unë mund t’i numëroj atij, këtu para jush me dhjetëra me qindra tendera të fituar në mënyrën më antiligjore, më të padrejtë nga familjarët e tij, nga baxhanaku i tij, nga thjeshtra e tij, në kundërshtim me ligjet, në kundërshtim me ligjin e interesit, për të cilat ai do të shkojë atje ku e ka vendin. Edhe unë kam qeverisur 8 vite. Le të gjejë një tender që kanë fituar fëmijët, apo njerëzit e mi. Zero, zero, zero”, u shpreh kryedemokrati.
Berisha gjithashtu i bëri thirrje Ramës të dalë dhe t’u tregojë hapur qytetarëve kontratat me vlerë 420 milionë euro që ka firmosur për inceneratorët e Tiranës, Fierit dhe Elbasanit, vepra infrastrukturore të cilat nuk funksionojnë ose nuk janë ndërtuar fare.
“Unë të them hajde këtu t’u tregojmë këtyre burrave dhe grave se çfarë ke firmosur tip, paf, paf, paf, e fap, fap, fap. Se si ke firmosur ti për të vjedhur vetëm me djegësit e Fierit, Tiranës, që nuk ekzistojnë askund, 420 mln euro.
Kurse unë kam firmosur mbi 7 mijë vendime qeverie dhe vendime të kryeministrit, asnjë prej tyre paf, paf, paf, e fap, fap, fap, por e kam firmosur, kam firmosur duke menduar 7 herë e firmosur një herë. Prandaj ti nuk vjen këtu, nuk del as në studio televizive dhe prandaj kalon shesh më shesh me gjuhën prej halabaku“, nënvizoi Berisha.