Nga Boldnews.al
Çdo reklamim dhe mbështetje ka një çmin monetar apo interes. Por çmim për t’u blerë dhe shitur i cili nuk gjendet në asnjë shitore është vetëm morali. Të kërkosh këtë të fundit në hapitatin e moçal politikës sonë, apo në botën e “art-sportit” shpesh është një betejë e humbur që në ngjizje.
Kryebashkiaku i Tiranës Erion Veliaj po vë në shërbim të zgjedhjeve artilerinë e parafundit, siç është tentativa për të treguar se “artistë të njohur” apo sportistë brenda dhe jashtë vendit, e mbështesin në punën e tij. E tillë është nisma me disa këngëtarë apo persona të tjerë në sport dhe kulturë. Me radhë nisën reklamimin për “mbështetjen e Lalit”, si: Ermal Mamaqi, Çiljeta Çilaga, Noizy dhe të tjerë individë që iu është mbushur mendja beton se janë artistët edhe në fushës së gjelbër.
Të vetëofruarit kanë emër, persona publik që morën sa e sa duartrokitje dhe emocione që të sjellin njerëzit e thjesht. Në lumin e madh që rreshtohen para një lëpirje gati të neveritshme nuk kanë si të mos bëjnë dallim dy emra. I pari është Andi Lila, ish-futbollist i Kombëtares Shqiptare dhe më pas jo pa rëndësi edhe Rita Sahatçia (Ora), këngëtarja me famë botërore që jeton në Angli.
Pak ditë më parë Lila u shfaq krah kryebashkiakut të Tiranës Erion Veliaj dhe kreut të Grupit Parlamentar të PS-së Taulant Balla në një takim elektoral në Kavajë dhe Rrogozhinë. Pasi i dha një vlerësim pa fre gjuhe Veliajt, i cili kënaqej nga përkulja e një futbollisti që emrin e bëri me zemër dhe gjunjë në fushën e futbollit, Lila doli në mbështetje të kandidatëve të PS-së për këto bashki. “Edisoni ka qenë portier me Rrogozhinën, jemi pothuajse moshatarë dhe shpesh herë i bëj edhe ndonjë gol…Ndërsa, për sa i përket Redit, atë e kam shok shkolle, shok të vjetër. Janë çuna fjalë pak e punë shumë”- tha Lila.
Moral ku je, si vdiqe kaq shpejt? Lila ka qenë kandidat për deputet i Partisë Demokratike në zgjedhjet e 25 prillit 2021. Përfaqësonte zonën e Kavajës dhe e provoi vetë dhunën e policisë bashkiake në atë kohë, duke e zbuar nga stadiumi po në Kavajë. Ishte ky “Redi”-shoku i shkollës së Andit, që e largoi turpërisht në sy të kamerave, teksa e nxorrën nga fusha ku po jepte intervistë, si të ishte një fshatar i vorfën që i kishte ikur lopa dhe po hante barin e fushës.
Gjithçka ngjan keq për Andi Lilën që askush nuk e beson se është aq keq financiarisht sa mezi pret zgjedhjet për të siguruar një thes miell në këmbim të votës për Rilindjen. Askush nuk mund të thotë që ai u “çmend” menjëherë sa vendosi të shkelmojë moralin, si të ishte një top që duhej spastruar nga zona e rrezikshme e portës në sekondat e fundit të shtesës.
Çfarë fitoi me këtë mbështetje? Mos ndoshta një bluzë të firmosur nga vetë ai i madh i Tiranës Erion Veliaj? Ndërsa këta këngëtarë e futbollistë shfaqeshin në spote të ndryshme në mbështetje të Lali Erit, një lumë kritikash u erdhën nga qytetarë të ndryshëm. Disa shkonin deri në sharje, të tjerë pyesnin sa ishte pagesa që kanë marrë nga kryebashkiaku i Tiranës.
Me gjestet e tyre Lila me të tjerë mund të mos ngjisi fare në elektorat e madje të ketë efekt të kundërt ftesa për të votuar Lalin, por mbollën një batërdi që do të jetë artileria e fundit e kandidatëve për kryebashkiakë të Rilindjes: “blerja e votës së qytetarëve të varfër”. Kur këtë krim e bëjnë njerëzit publik përse të mos e bëjnë edhe ata, por me një ndryshim shumë të madh. Qytetari i varfër edhe nëse e shet votën nuk e ka bërë për luks por për bukën e fëmijëve të tij. Mund të shesin pak kohë “stomakun”, por jo shpirtin.
Të gjithë këta “artisto-futbollistë” duhen mishiruar në ndonjë rast që shukat e parave ua mbyllën sytë për të parë batërdinë e betonizimit dhe ndotjes së kryeqytetit i cili në tetë vite po bëhet gjithnjë e më i pajetueshëm. Vetë “artistët e mëdhenj” nuk jetojnë në zonën urbane të Tiranës. Shumë prej tyre janë fqinj me oligarkët e ndërtimit dhe manjatët e media-kullave në periferi të Tiranës, në vendin që njihet si oazi i pasunarëve biznesmenë dhe krerëve të krimit të organizuar. Ka vilë bërbri të fortit dhe pasunarit por nga ana tjetër reklamon sikur jeton si shumë qytetarë të tjerë në mesin e Tiranës së ndryshuar nga Lali Eri.
Po Rita Sahatçia (Ora) çfarë pati që doli kaq hapur në mbështetje të Erion Veliajt? Edhe për të, ashtu si për Lilën akush nuk mund të thotë se mbeti pak hollë nga paratë dhe hodhi grepat për të pëshkuar ndonjë lek që të mbajë familjen. Të gjitha vërtiten rreth moralit, në këtë “send” që vlerën e ka aq të madhe sa askush nuk është në gjendje të ta blejë. Arsyeja është e thjesht sepse nuk është për tu shitur.
Rita Ora jeton në Londër, në kryeqytetin e Anglisë që është bërë oazi i mijëra emigrantëve shqiptarë që vinin aty me gomone. Ikën shumë për të shpëtuar nga shtypja e Ramës dhe Veliajt. Ikën se këtu nuk gjenin shpresën. A e di këtë Rita Sahatçia, po Andi Lila? Shumë para janë hedhur për atë reklamim ku ftojnë qytetarët të votojnë njeriun e betonit. Le të ecim Për Para me And opozitarin dhe Ritën e Sahatçijve që nuk shohin dot as Sahatin, simbolin e kryeqytetit që e ka zënë kulla e Lalit.
