Katër ushtarë sirianë dhe tre paraushtarakë pro-iranianë u vranë nga sulmet me raketa izraelite gjatë natës në Aleppo, Siri, sipas Observatorit Sirian për të Drejtat e Njeriut.
Sulmet me raketa nisën rreth gjysmë ore para mesnate në zonën e aeroportit ndërkombëtar, ku u raportuan shpërthime dhe zjarr në një zonë të ruajtjes së municioneve.
Më herët agjencia siriane e lajmeve SANA kishte raportuar se “një ushtar u vra dhe shtatë persona u plagosën, duke përfshirë dy civilë”.
Observatori Sirian për të Drejtat e Njeriut, një OJQ me bazë në Britani, tha se përveç aeroportit ndërkombëtar të Aleppos, ka pasur edhe dëme të konsiderueshme në aeroportin ushtarak Nayrab.
Që nga shpërthimi i luftës civile siriane në vitin 2011, Izraeli ka nisur qindra sulme ajrore në territorin sirian kundër instalimeve ushtarake, si dhe pozicioneve të forcave iraniane dhe grupeve të armatosura pro-iraniane, veçanërisht Hezbollahut të Libanit.
Grupet paraushtarake të mbështetura nga Irani kanë një prani të fortë në rajonin e Aleppos, ku i dhanë mbështetje thelbësore ushtrisë siriane kur ajo rimori qytetin nga duart e rebelëve në vitin 2016.
Ministria e Jashtme siriane dënoi sulmet izraelite, duke e quajtur atë një “përpjekje trishtuese për të penguar përpjekjet e vazhdueshme diplomatike për të rivendosur sigurinë dhe stabilitetin në rajon”.
I izoluar ndërkombëtarisht prej vitesh për shkak të një shtypjeje të dhunshme të protestave pro-demokracisë në vitin 2011, Presidenti sirian Bashar al-Assad javët e fundit ka kontaktuar me liderët e disa shteteve arabe, disa prej të cilëve duan ta shohin Damaskun të kthehet në Ligën Arabe nga e cila u ndalua 12 vjet më parë.
