Një sherr për një aparat celular, që ka degjeneruar më pas në përdorimin e armëve të ftohta ka ndodhur në qytetin e Vlorës.
Një 47-vjeçar i identifikuar si Erion Memushaj ka mbetur i plagosur nga goditjet me thikë që ka marrë nga autori i ngjarjes, Ardit Trushi.
Ngjarja është shënuar pranë sahatit të vjetër të qytetit dhe policia ka reaguar në kohë duke arrestuar autorin 34-vjeçar.
Sakaq, raportohet se Memushaj që u transportua me urgjencë në spitalin e Vlorës, ndodhet jashtë rrezikut për jetën.
Njoftimi i policisë:
Goditi me mjet prerës (thikë), një shtetas, falë reagimit të menjëhershëm, shërbimet e Policisë kapin autorin e dyshuar. Rreth orës 12:55, në lagjen “28 Nëntori”, dyshohet se gjatë një konflikti për motive të dobëta, shtetasi A. T., 34 vjeç, ka goditur me mjet prerës (thikë), shtetasin E. M., 47 vjeç.
Shërbimet e Policisë kanë kapur autorin e dyshuar të ngjarjes, shtetasin A. T., dhe e kanë shoqëruar atë në ambientet e Komisariatit të Policisë Vlorë.
Shtetasi E. M. ndodhet në spital, në kujdesin e mjekëve.
Vijon puna e grupit hetimor, për sqarimin e plotë të rrethanave të ngjarjes.
