Kryetari i PD-së, Sali Berisha, gjatë një takimi elektoral në Shkodër këtë të Martë, i bëri apel kandidatit të socialistëve në këtë bashki, të dalë në debat publik me kryebashkiakun Bardh Spahia.
“Karshi Bardh Spahisë kandidon përfaqësuesi i Edi Ramës. E meriton këtë që po bëni ju (fishkëllima), megjithatë kjo është njëra anë, ana tjetër është ftesa ime; Benet hajde këtu bashkë me Bardh Spahinë, dilni para qytetarëve dhe jepni, jepni llogari për çdo gjë. Përgjigjuni të gjitha pyetjeve të qytetarëve të Shkodrës dhe me këtë ti dëshmon se ke ndjenjën e përgjegjësive, përgjegjësisë ndaj qytetarëve të Shkodrës. Me këtë ti shlyen deri diku një detyrim sepse dy vjet në atë parlament nuk e shqipërove njëherë fjalën Shkodër dhe Shkodran. Benet vetëm për këtë kam bindjen se gjysma e Becëve nuk do të votojnë ty”, tha Berisha.
“Benet, vetëm për këtë kam bindjen se as gjysma e Becve nuk do të votojnë ty. Kandidimi yt për Edi Ramën, njeriun që ka përqendruar pushtetet në duart e tij, në mënyrë identike me despotin Enver Hoxha është gabimi fatal i jetës tënde. Shpirti yt e di se çfarë të detyroi ty ta bësh këtë gabim. Di diçka edhe Tom Doshi. Shko pak tako Senadën, Namikun, zonjën Hafizi, si u flakën si limon i shtrydhur, Edhe Edona e Zeusit, kam dorëheqjen e saj këtu. Nga do dalësh ti. Benet edhe njëherë po të them, ke bërë gabimin e jetës tënde”, shtoi ai.
