Një ngjarje e pazakontë raportohet të ketë ndodhur në Elbasan ditën e sotme.
Bashkia e Elbasanit ka shkatërruar pronën e një qytetari, e cila ishte e mbjellë me ullinj, për të hapur rrugën për dy familje. Pronarët e tokës shprehen se për hapjen e rrugës nuk ka asnjë vendim të firmosur nga Gledian Llatja, gjë të cilën e ka pranuar edhe kreu i njësisë administrative. Banorët, shprehen se ky dhunim prone po bëhet për qëllime elektorale.
Me një akt të paprecedent, prona e qytetarit Ismail Hasani është dëmtuar nga fadroma të bashkisë së Elbasanit, të cilat kanë ndërhyrë gjatë natës duke shkulur disa rrënjë ullinj për të hapur një rrugë.
Sipas pronarit të tokës, Ismail Hasani, ndërhyrja në pronën e tij është bërë pa pasur një urdhër të shkruar dhe firmosur nga kryebashkiaku i Elbasanit, Gledian Llatja.
Sipas banorëve, bashkia po hap një rrugë përmes pronës së qytetarit duke u krijuar mundësi kalimi vetëm dy banesave. Por, sipas banorëve, aktualisht është një rrugë ekzistuese, e cila kalon rreth pronës së qytetarit, ndaj për ta është e pashpjegueshme pse bashkia po prish një pronë private.
Astit Hazizi, Administrator i Njësisë Administrative Labinot Fushë, ka pranuar se ai nuk disponon as leje dhe as vendim për të ndërhyrë në pronën e qytetarit.
Qytetarët, të cilët preken nga ky vendim i bashkisë, në një prononcim për Syri TV, shprehen se për këtë ndërhyrje institucioni i drejtuar nga Gledian Llatja, ka kryer tre vepra penale: shkatërrim prone, krim zgjedhor dhe ndërtim pa leje.
