Kreu i Partisë Demokratike, Sali Berisha ishte mesditën e kësaj të Shtune në Librazhd ku prezantoi kandidatin e koalicionit ‘Bashkë Fitojmë’, Shefki Çota.
Gjatë fjalës së tij Berisha hodhi akuza ndaj kryeministrit Edi Rama, duke thënë se i dalin qindra miliona euro në kompanitë offshore nga tendaret e tij, baxhanakut, thjeshtrës dhe vëllait të implikuar në dhjetëra afera.Po ashtu tha se Rama kërkon që të mashtrojë shqiptarër me zorrën qorre në gojë.
Nga takimi me qytetarët, kryedemokrati ka sfiduar edhe njëherë kryeministrin Edi Rama për t’u përballur në një debat televiziv.
Berisha: I them Edi Ramës hajde dalim bashkë në studio dhe merr ç’të kesh për Sali Berishën dhe unë ç’kam për ty.
Nuk ia mban, jo vetëm nuk del vetë, por nuk le asnjë prej kandidatëve të tij.
Nuk ia mban se i dalin qindra milionë euro të fshehura offshorë, i dalin qindra tendera të baxhanakut, thjeshtrës, i del vëllai i implikuar në shumë afera.
I del firma e tij në 420 milionë euro për djegësat, i del firma për Durrësin.
Më ka thënë njëherë një avokat i famshëm amerikan: kam pasur shumë klientë që kishin vjedhur nga 1 miliard dhe duhej t’i mbroja, por secili ishte i gatshëm të vidhte edhe 1 miliard tjetër.
Ua thashë këtë sepse këta nuk kanë të ngopur në asgjë.
Sa i takon kandidatit opozitar, Berisha u shpreh se është një përfaqësues i denjë, një njeri i aftë, teksa ju bëri thirrje qytetarëve të votojnë Shefki Çotën.
Berisha: Tani duhet të bashkohemi. Të votojmë Shefki Çotën.
Ai është një përfaqësues i denjë i juaj, një menaxher i shkëlqyer, një familjar shembullor, një njeri i aftë, një qeveritar i vërtetë.
Por edhe një qytetar njëlloj si ju.
Vërtet ju votoni për veten tuaj dhe në këto zgjedhje, të votosh Edi Ramën, do të thotë të votoni për thellimin e varfërisë, për dëbimin e shqiptarëve nga Shqipëria.
Por përsëri, qeverisja vendore ka shumë në dorë të ndryshojë për mbarë jetën tuaj.
Ka shumë në dorë të nxisë lulëzimin e biznesit, të përgjysmojë taksat. Kjo do të thotë dyfishim punësimi.
Të bëjë gjithçka për ndarjen e drejtë të buxhetit deri në zonat më të largëta.
Shefki Çota, i dyti në fletën e votimit për kryebashkiak të Librazhdit, në këtë betejë elektorale garon me kandidatin e PS, Mariglen Disha.
