Gjatë ditës së sotme policia ka sekuestruar një tjetër serë për kultivimin e kanabisit në Krujë, por ka dështuar për të vendosur në pranga autorët.
Uniformat blu bëjnë me dije se janë sekuestruar 782 kubikë me kanabis sativa në një serë të improvizuar në fshatin Mafsheq të Krujës.
“Skuadrat policore konstatuan në një territor të fshatit Mafsheq, Krujë, një serë të improvizuar, brenda së cilës u gjetën 782 kubikë, të mbushur me fara të dyshuara narkotike kanabisi, në proces mbirjeje. Kubikët u sekuestruan në cilësinë e provës materiale. Komisariati i Policisë Krujë dhe Drejtoria Vendore e Policisë Durrës, në bashkëpunim me Prokurorinë pranë Gjykatës së Rrethit Gjyqësor Krujë, vijojnë veprimet e thelluara hetimore, për identifikimin dhe kapjen e autorit/ëve të kësaj veprimtarie kriminale”, njofton policia.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprën penale “Kultivimi i bimëve narkotike”.
