Kolegji i Posaçëm i Apelimit njoftoi këtë të Martë vendimin për lënien në fuqi të shkarkimit nga detyra të ish-gjyqtares së Apelit Tiranë, Flutura Skënderi. Vendimi u mor me shumicë votash në dhomë këshillimi nga trupi gjykues i KPA i kryesuar nga Albana Shtylla, me relatore Rezarta Schuetz dhe anëtare Ina Rama, Mimoza Tasi e Natasha Mulaj, duke e rrëzuar ankimin e Skënderit.
Ish-gjyqtarja Flutura Skënderi u shkarkua nga detyra nga Komisioni i Pavarur i Kualifikimit më 23 korrik 2020. Gjatë seancës dëgjimore, u konstatuan probleme në kriterin e pasurisë. Ndërkohë, ajo u vlerësua pozitivisht për pastërtinë e figurës, si dhe nuk u gjetën probleme në kriterin profesional.
Flutura Skënderi e filloi karrierën në sistemin e drejtësisë në vitin 1993 në Gjykatën e Rrethit Gjyqësor Tiranë. Një vit më vonë ajo emërua në Gjykatën e Apelit Tiranë, ku e ushtroi funksionin deri në shkarkimin nga detyra.
