Pas hedhjes së satelitëve në hapësirë, benefitet e të cilëve për qytetarët shqiptarë mbeten mister, kryeministri Edi Rama ka premtuar të tjera investime në teknologji. Në një aktivitet këtë të Premte, ai u zotua se tenderat do të jepen nga inteligjenca artificiale.
Më shumë se 6 milionë dollarë është shifra e kontratës së satelitëve, të propaganduar nga Rama si një çyçyve qiellore gati magjibërëse. Sipas tij, ato do të kontrollonin territorin duke sjellë përmirësime në shumë fusha dhe më shumë siguri.
Projekti pati skepticizëm me kundërshtarë që artikuluan se vendi ka probleme më akute për të cilat duhet investuar. Të tjerë, ekspertë të fushës, spjeguan se satelitët kanë shumë më pak “fuqi magjike” se ç‘pretendonte Rama.
Megjithatë, kreu i qeverisë avancoi me nismën dhe në fillim të vitit, përmes disa pamjeve të shpërndara në rrjetet sociale, njoftoi ngritjen në hapësirë të satelitëve të emëruar “Albania 1” dhe Albania 2”.
Me kalimin e kohës dhe dinamikave të vrullshme që prodhon Shqipëria e vogël, satelitët u harruan, derisa një seri vrasjesh mafioze tronditën vendin. Autorët siç ndodh rëndom, ikën në drejtim të paditur për policinë. Në këtë pikë, u sollën sërish në kujtesë satelitët që sipas kryeministrit do të kontribuonin në përmirësimin e sigurisë dhe kontrollit të territorit.
“Po satelitët ku janë?!”, u shtrua pyetja.
E teksa të mirat publike të veglave të Ramës në hapësirë mbeten të panjohura, sot ai dha një tjetër premtim ‘vizionar’. I mbështetur sigurisht nga ministrja e Financave.
“Ne po punojmë për vënien në dispozicion dhe përdorim të Inteligjencës Artificiale për të digjitalizuar të gjitha shërbimet e tregut të punës, si dhe për të krijuar një dritare unike për të papunët, punëkërkuesit dhe emigrantët që rikthehen në atdhe”, tha Delina Ibrahimaj, në forumin e klimës së biznesit.
Ndërsa lideri i vendit Edi Rama, u shpreh: “Inteligjenca Artificiale do të kryejë të gjitha prokurimet publike. Kompanitë do duhet të çojën vetëm ofertën ekonomike dhe asgjë tjetër. Duam t’i shkrijmë Komisionet e Vlerësimit të Ofertave”.
